Қазіргі заманды әлеуметтік желісіз елестету қиын. Телефонға телміріп, әлеуметтік желінің арбауына түсіп, біреудің сыртынан келеңсіз пікірлер жазып, өзгені жамандап, өзіне ұпай жинап жүрген жандар жиілеп барады. Шыны керек, таңертең ұйқыдан ояна сала «Кім не істеп жатыр, не жүктеді?» екен деп ғаламторды ақтарамыз. Таңымызды желіге желімдей жабысып отырып, атырып, кешімізді де солай батырамыз. Әлеуметтік желі бүгінде біздің бір бөлшегімізге, қоғамның бір бөлігіне айналды. Ол бізге берілген мүмкіндік пе, тәуелділік пе?
Ғаламтор – ақпарат алмасудың жылдам әрі қолжетімді көзіне айналды. Бір ғана жазба арқылы әлем жаңалығын білуге болады. Жақсысы, кәсіп ашқан жандар үшін бұл тегін жарнама құралы. Үйде отырып табыс тауып жүргендер кәсібін әлеуметтік желі арқылы дөңгелентуде. Шығармашыл жанға өзін танытатын мүмкіндік, оқушылар мен студенттерге білім алудың қосымша жолы. Сонымен қатар, ол байланыс құралы. Алыстағы туыспен тілдесу, бұрынғы сыныптасыңды табу, пайдалы ортаға қосылу барлығын бір батырма арқылы шешесің. Алайда, мүмкіндікпен бірге кері әсерін де жоққа шығармаймыз.
Әлеуметтік желінің жақсы жағы жетіп артылады. Бірақ, бүгінгі қоғамда оның пайдалы тұсынан зияны басым болып тұр. Әр заттың өз шегі болады. Әлеуметтік желіні де дұрыс пайдалана білу қажет. Дұрыс пайдаланбасақ, ол адам уақытын жеп қояды. Желіге бес минутқа кірген адам, бірнеше сағаттың қалай өткенін байқамай қалады.
Психолог мамандардың пікірінше, әлеуметтік желіге шамадан тыс әуестік көру қабілетінің нашарлауына, ұйқының бұзылуына, ал ұйқы көңіл-күйдің тұрақсыздығына, тіпті өз-өзіне сенімнің төмендеуіне әсер ететінін айтады. Бүгінде өзгенің «әдемі өмірін» көріп өз өмірін бағаламайтындар да жиілеп барады. Әсіресе, жасөспірімдер арасында «лайк» пен пікірге тәуелділік қалыптасып барады.
Яғни, адам өз құндылығын ішкі сеніммен емес, өзгелердің даусымен өлшеуде. Мұндай жағдай өз басымнан да өтті. Желіге жұмысымның барысынан бейнематериал жариялап, оның көпшілікке қалай әсер ететінін тағатсыздана күтетінмін. Дәл мен ойлағандай керекті дауыс жинамады. Соған бола бірнеше күн көңіл-күйім болмай, өзімнің осы күйге қалай түскенімді байқамай қалдым. Уақыт өте түсіндім, әлеуметтік желі еңбегімнің шынайы өлшемі емес, тек дамуға ықпал ететін қосымша құрал ғана екен.
Адамның шынайы құндылығы экрандағы санмен емес, еңбегімен және өмірдегі нақты әрекетімен айқындалады. Сондықтан желіні саналы түрде пайдаланып, шынайы өмірдің қадірін ұмытпайық.
Аружан МОЛДАБЕК,
ЖУ-дің студенті
