«Ұлттың бүгіні де, болашағы да тәрбиелі ұрпақтан» басталады деген тәлімді ой бар. Оның негізі – тәлімі мол тәрбиеші. Осы ретте Талдықорғанда облыстық «Үздік балабақша – 2024» байқауы өтті. Додаға мектепке дейінгі білім беретін мекемелердің меңгерушілері мен олардың орынбасарлары қатысты. Сайыстың өтуіне облыстық білім басқармасы мұрындық болды.
Ең әуелі №27 орта мектеп-гимназиясының файесінде шаһардағы балабақшалардың көрмесі ұйымдастырылды. Байқау басталмас бұрын жиылған халық бүлдіршіндердің өнерін тамашалап, көрмемен танысты. Онда әр балабақша тәрбиешілері логикалық ойлау, математикалық даму, ұлттық құндылықтарды дәріптеу бағыты бойынша түрлі идеялардың жүзеге асырылуын көзбен көріп, іштей бағасын берді.
Аталған байқауға өңір бойынша 10 балабақша қатысты. Олар «Таныстыру», «Инновациялық калейдоскоп» кезеңдері бойынша сынға түсті. Тәрбиешілердің жұмыстарын арнайы қазылар алқасы бағалады.
Облыстық додада қалалық, аудандық деңгейде «Үздік» танылған балабақшалар бақ сынасты. Байқау мектепке дейінгі білім берудің ерекше үлгілерін анықтау және мектепке дейінгі ұйымдардың шығармашылықпен жұмыс істейтін ұжымдарын қолдау және ынталандыру мақсатында өткізілуде. Мұнда тәрбиешілерге мемлекеттік жалпыға міндетті стандарт пен үлгілік оқу бағдарламасын жүзеге асырумен қатар, заттық-дамытушы ортаны құру, балалардың қызығушылықтары ескерілген инновациялық білім беру бағдарламаларын тиімді әрі нәтижелі жүзеге асыруын қамту талабы қойылды.
Шара аясында облыстық білім басқармасының басшысы Марат Сүлейменов сөз сөйлеп, қатысушыларға сәттілік тіледі. Ұрпақ үшін аянбай қызмет етуге шақырды.
Байқау қорытындысы бойынша I орын Талдықорған қаласынан «№7 бөбекжай-бақшасының» меңгерушісі Гүлниса Тұлымшақоваға, II орын Панфилов ауданынан келген «Арай» балабақшасының меңгерушісі Райгүл Исабековаға бұйырды. III орынды Текелі қаласынан «№1 бөбекжай балабақшасының» меңгерушісі Жамилия Кәлімбекова еншіледі. Алакөл ауданы «Үздік инновациялық алаң», Қаратал ауданы «Ізденімпаз балабақша», Көксу ауданы «Креативті балабақша» номинацияларымен марапатталды.
Медет ЖҰМАБАЙ
