Қаратал ауданына қарасты Жаңаталап, Бастөбе, Қанабек, Достық ауылдарының тұрғындары табиғи газға қол жеткізді. Жергілікті халық осындай тарихи сәттің куәсі болды. Төрт ауылға жалпы ұзындығы 96 шақырым құбыр тартылып, 6400 тұрғын газға қосылуға мүмкіндік алды.
Шара барысында облыстық энергетика және тұрғын үй-коммуналдық шаруашылық басқармасының басшысы Айдос Бекетаев алдымен ат басын Жаңаталап ауылына бұрып, газға қосылған ауыл тұрғындарына жылы лебіз білдірді.
– Биыл жоспар бойынша 30 жоба жүргізілуде. Жыл соңына дейін аяқтаймыз. Сонымен қатар, Талдықорған- Үшарал бағыты бойынша газ магистралы тартылады. Оны 2028 жылға дейін аяқтауымыз керек. Жұмыстар күзде басталады. Ол жерде Алакөл, Сарқан, Ақсу аудандарына қарасты 66 елді мекен газдандырылады. 2026 жылға дейін Қаратал ауданының тұрғындары толықтай көгілдір отынды пайдаланады, – деп газ тарту бойынша облыстағы атқарылып жатқан жұмыстарды баяндап, салтанатты шараға жиналған көпшілікке ақжарма тілегін жеткізді.
Шара барысында ақжаулықты әжелер ауылға келген газды жағып, шашу шашса, ақсақалдар батасын беріп, жылы тілегін ақтарды. Газды үйіне алғашқылардың бірі болып Зина апамыз қосыпты.
– Осы жылға дейін біз көмір жағып, ағаш кесетінбіз. Ертеңгісін от жақсақ, түске таман үй суып қалады. Мен сол кезде тоқ пеш қосамын. Өйткені тізем ауырады. Көгілдір отын қосып көзіміз ашылды. Бір температураны ұстап тұрады, – деген ол облыс, аудан басшылығына алғыс жаудырды.
Бастөбе ауылындағы Майра Еришева да алғашқылардың бірі болып көгілдір газға қосылыпты.
– Көгілдір отынға ең бірінші болып біз қосылдық. Қыстың көзі қырауда отын тасып, пеш жағу қиын. Сондықтан халық игілігі үшін газ қосқан жандарға ризашылығымызды білдіреміз, – деді ол.
Достық ауылының тұрғындары да тарихи сәттің куәсі болғанына қуанып, пікірлерін білдірді.
Айта кетейік, осы уақытқа дейін облыста 33 елді мекен газдандырылып, 327 мың тұрғын көгілдір отынға қол жеткізген болатын. Ал биылғы жылдың соңына дейін Көксу, Қаратал, Ескелді аудандары мен Талдықорған қаласында тағы 30 елді мекен газға қосылады, 433 км. газ тарату желілері салынады деп жоспарланған.
Айдар ҚАЛИЕВ
