Облыста санаторлық-курорттық емделуге арналған оннан аса ірі мекеме бар. Олардың қызмет сапасына мамандардың қызмет көрсетуінің нашарлығына байланысты облыстық сауда және тұтынушылардың құқықтарын қорғау департаментіне соңғы 1 айда 3 шағым түскен.
Осыған орай департамент «Жетісу облыстық тұтынушылардың құқығын қорғау» қоғамдық бірлестік өкілдерімен бірлесіп қоғамдық қабылдау ұйымдастырды.
Қабылдау барысында Талдықорған қаласының А. есімді тұрғыны ем-дом алуға барған шипажайдың қызмет көрсетуіне ренжіп, шара қолдануды сұрады.
Департамент басшысы Айдос Дауешев қызмет көрсетушіге жазбаша шағым жазу керектігін айтты.
Мәселенің мән-жайын анықтау барысында шипажай басшылығы кемшіліктің орын алғандығын растап, келеңсіздікке байланысты қызмет алушыдан кешірім сұрап, кінәлі қызметкерлерге сөгіс жарияланғанын жеткізді.
Ашық есікке келген тұрғынның бірі алданып, сапасыз массаж шапанын алғандығы жөнінде арыз айта келді. Айта кетерлік жәйт, сапасыз массаж шапан алушылар саны азаймай тұр. Жыл басынан бері 7 тұтынушы өтініш білдіріп, 4 тұтынушының 4 470 000 теңге қаржысы өздеріне қайтарылған.
Талдықорған қаласындағы зейнеткер жарты миллионға жуық қаржыға онлайн тапсырыспен аяғына арналған жақпа май алған. Алайда ол препараттың қолдану мерзімінің өтіп кеткенін байқамаған. Зейнеткер жақпамайды қолданған соң аяғын күйдіріп алған.
Департамент басшысы Айдос Дауешев тұтынушыға препараттан зардап шеккендігі туралы құжаттарды дайындап, сотқа арыз беру керектігін түсіндірді.
Егер де тұтынушы ретінде құқықтарыңыз бұзылса, Талдықорған қаласы, Қабанбай батыр көшесі, 78 мекенжайы бойынша департаментке жүгінуді сұраймыз.
Байланыс тел.: 87282415610, 87714412905.
