Биыл «Жұмысшы мамандықтар жылы» деп жарияланды. Президенттің еңбек адамына ерекше көңіл бөлгендігі елді қуантты. Бұл – еліміздің техникалық және кәсіптік білім беру жүйесіне серпін береді. Ақсу агротехникалық колледжі 60 жылдық тарихында жиырма бес мыңнан астам орта буын маманды даярлап шығарған іргелі оқу орны. Аталмыш оқу орны «Ақсу қант» акционерлік қоғамы үшін маман даярлайды.
Білім беру мекемесі мен өндіріс орындарының арасында шәкірттерді мамандыққа бірлесіп баулу бойынша келісімшарт жасасқан. Яғни, екеуара әлеуметтік серіктестік орнатқан. Екіжақты байланыс білім алушыларды еңбекке баулиды. Алғашында механизаторлар мектебі болып ашылған оқу орны қазір жан-жақты дамыған. Колледж «Ақсу қант» зауытының сұранысына орай маман даярлайды. Зауытқа жаңадан «Зертханалық технология», «Электр жабдықтары», «Технологиялық процестерді автоматтандыру және басқару» мамандығы бойынша мамандарды оқытып шығарады.
Соңғы жылдары «Қант өндірісі», «Қант өндіру операторы» мамандықтары бойынша білім беріле бастады. Жаңа мамандықтар бойынша колледждің материалдық-техникалық базасы толықтырылып, балаларды өндіріске машықтандырды.
Биыл «Ақсу қант» ЖШС өндірістік материалдық базасында колледждің 10 оқыту шебері мен пән оқытушылары тағылымдамадан өтті. Қант өңдеу өте күрделі және көп еңбекті қажет ететін технологиялық үрдіс. Маман технологиялық талаптарды бұлжытпай орындауы керек. Бұл орайда, зауыттың техникалық директоры Жандос Баймұханбет: «Колледж бізге үлкен көмек көрсетіп отыр. Қандай мамандық керек болса, соған тапсырыс береміз. Олар техникалық жағдайларын реттестіріп болған соң маманды тәрбиелейді. Әлі де керек мамандарымызды оқытып жатыр. Биыл зауыт өнімнің көптігінен көктемге дейін жұмыс істейді. Студенттер оқу орнынан шәкіртақы, ал бізден айлық алып отырады. Дуальді оқытудың пайдасы көп»,– дейді. Оқу орнында Қапалдағы «Алтын ине» ЖШС-нің тапсырысы бойынша тігінші мамандығына да даярлау жүріп жатыр екен. Сондай-ақ, мұнда көлік жүргізу мамандығы бар. Балалар қыста жүргізушілікті жасанды көлікпен үйренеді.
Агротехникалық колледж директорының кәсіптік оқыту жөніндегі орынбасары Жандос Қайролдаұлы: «Ұл-қыздарды жұмысшы мамандығына даярлаймыз. Балалар 10 мамандық бойынша білім алады. Мұнда 420 орынды жатақхана бар. Түсте ыстық тамақ тегін беріледі. Жыл сайын балалардың 60 пайызын зауыт жұмысқа алады. Олар оқу орнынан шәкіртақы, зауыттан айлық алады. Бұл студентке де, өндіріс орнына да тиімді»,–дейді ол.
«Жұмысшы мамандықтар жылы» жер-жерде әртүрлі ілгерінді шаралар қолға алынуда. Игі істер жұмысшы мамандығының экономиканы дамытуда алатын орнының зор екендігін білдіреді. Еңбекқордың жүзі қашан да жарық.
Гүлжан ТҰРСЫН
Фото: Дмитрий ЕРОФЕЕВ
Ақсу ауданы
