Елордада өтіп жатқан «College Board SAT | AP Days» халықаралық форумы аясында отандық білім беру жүйесін халықаралық стандарттарға интеграциялау бағытында маңызды келісім жасалды, – деп хабарлайды 7-su.kz ақпараттық порталы.
Халықаралық форумға ҚР Ғылым және жоғары білім министрі Саясат Нұрбек қатысып, жоғары білім беру жүйесін дамыту, жастардың академиялық мүмкіндіктерін кеңейту және студенттерді даярлау сапасын арттыру үшін халықаралық ынтымақтастықтың маңызын атап өтті. Аталған бастама Мемлекет басшысы айқындаған білім беруді интернационалдандыру саясатына толық сәйкес келеді. Жиын барысында министр өз сөзінде еліміздің жаһандық білім беру жүйесіне белсенді түрде кірігіп жатқанын тілге тиек етті.
Саясат Нұрбек өз сөзінде:
«Қазақстан әлемнің жетекші университеттерімен серіктестікті дамытып, микрокампустарды қоса алғанда, білім берудің инновациялық модельдерін енгізу арқылы жаһандық білім беру жүйесіне белсенді түрде кірігіп келеді. Орталық Азиядағы демографиялық өзгерістер шетелдік студенттерді тартуға, білім беру инфрақұрылымы мен ғылыми зерттеулерді дамытуға, білім сапасын арттыруға және университеттеріміздің халықаралық бәсекеге қабілеттілігін нығайтуға жаңа мүмкіндіктер ашады», – деді.
Форум аясында ҚР Ғылым және жоғары білім министрлігінің Ұлттық тестілеу орталығы мен «College Board» халықаралық коммерциялық емес ұйымы өзара түсіністік туралы меморандумға қол қойды. Маңызды құжатты Ұлттық тестілеу орталығының директоры Нұрсейіт Байжанов пен College Board вице-президенті Руши Шет куәландырды. Серіктестік талаптарына сай SAT емтиханының нәтижелері ACT, International Baccalaureate (IB), A Level, IELTS және TOEFL сияқты халықаралық бағдарламалармен қатар Ұлттық бірыңғай тестілеу (ҰБТ) балдарына баламалы түрде аударылады. Сондай-ақ Advanced Placement (AP) бағдарламасының көрсеткіштерін жоғары оқу орындарына қабылдау кезінде есепке алу тетіктерін жетілдіру жоспарлануда.
Бұл бастамалар Жетісу өңіріндегі оқу орындары мен мектеп түлектеріне халықаралық білім алу процестеріне тікелей қатысуға жаңа өріс ашады. Аймақ жастарының әлемдік емтихандар тапсырып, жетекші ЖОО-ларға түсу мүмкіндігі артып, отандық кадрлық әлеуеттің сапасы арта түседі.
