Қазіргі заман дамуын жарық жылдамдығымен пара-пар қойсақ артық болмас. Қысқа мерзім ішінде ғылым-білім, технологиялар индустриясы өркендеп, әлем бойынша талай өзгерістерді бақылай аламыз. Соған орай адам жан-тәні, психологиясы өзгеріп, тіпті, көп жаңашылдықтың салдарынан үрей-қорқыныштары пайда болып, инстинктивті түрде қорғаныш сезімі оянып, қоршаған ортадан оқшаулану қаупі де туындап келеді.
Толассыз өзгерістер барысында көш ілгері елдер қатарынан алдыңғы орын алу үшін біздің балаларымыз өзгерістерге ашық, ізденімпаз, сауатты болуы абзал. Ғаламторға тәуелділік өміріміздің айырылмас бөлігіне айналғалы бері баламыздың аталған қасиеттерден алыстап бара жатқаны айдан анық. Ғасыр дерті болып саналатын зиянды әдеттер – баланың бойында ұяңдыққа әкеліп соғуда.
Ұяң балалар өз ойларымен ұялшақтықтың кесірінен бөлісе алмайды. Бала бойындағы талант та ұяңдықтың салдарынан дамымайды. Ұяң оқушы ата-ана, өскен ортасы, мектеп мұғалімдері, достары, сыныптастары, үйірме жетекшілерімен қарым-қатынасқа емін-еркін түсе алмайды. Мұндай оқушылармен жұмыс істеуде шешендік өнердің игіліктері мен артықшылықтары маңызды рөл ойнайды. Шешендік өнер баланы еркін сөйлеуге, терең ойлауға, ұтқыр шешім қабылдауға, тапқырлыққа, суырыпсалмалық қасиеттерді дамытуына, өз ойын анық жеткізе алуға көмектеседі. Болашақта балаларға арнап білім ордаларында заман талабына сай шешендік өнер үйірмелері ашылса нұр үстіне нұр болар еді.
Бүгінгідей ақпарат пен жаңа технологияның дамыған заманында мәдениетті, білімді, белсенді, білікті жеке тұлға тәрбиелеу – педагогтың басты міндетінің бірі. ХХІ ғасыр – ақпарат пен жаңа технология ғасыры болғандықтан балалар да заман ағымынан, көш басынан қалмауы керек. Десе де бала бойына ең бірінше адами қасиеттерді дарытқанымыз жөн.
Жас ұрпақ – ертеңгі елдің болашағы. Сондықтан да біз бірлесе әрекет етуіміз керек. Сонда ғана жемісті нәтижеге қол жеткізе аламыз. Ұяң балаларды белсенді оқушылардың қатарына қосып, жеке тұлға етіп тәрбиелеу – әрбір ұстаздың міндеті.
Ақбота СЕРҒАЗИНОВА,
Қалқа Жапсарбаев атындағы орта
мектептің әлеуметтік педагогі
Мұқыры ауылы,
Көксу ауданы
