БҰҰ Балалар қорының (ЮНИСЕФ) 2024 жылғы MICS зерттеуінің қорытындысына сәйкес, Қазақстанда ата-аналардың балаларды тәрбиелеу барысында физикалық жазалау мен психологиялық қысым қолдану деңгейі 53%-дан 38%-ға дейін төмендеді. Бұл көрсеткіш – Еуропа және Орталық Азия елдері арасындағы ең төмен деңгейлердің бірі.
Бұл туралы Бухарест қаласында өткен балаларға қатысты зорлық-зомбылықты жою жөніндегі халықаралық конференцияда ЮНИСЕФ-тің өңірлік кеңесшісі Аарон Гринберг мәлімдеді. Шараға Еуроодақтың 32 елі мен Орталық Азия мемлекеттерінің үкімет өкілдері қатысты.
Конференция барысында Қазақстан Республикасының Бала құқықтары жөніндегі уәкілі Мемлекет басшысы Қасым-Жомарт Тоқаевтың тапсырмасымен жүзеге асырылып жатқан балалардың қауіпсіздігін күшейтуге бағытталған реформаларды, зорлық-зомбылықтың алдын алуға арналған заңнамалық өзгерістерді, ұлттық деңгейдегі қорғау механизмдерін халықаралық қауымдастыққа таныстырды. ЮНИСЕФ өкілдері Қазақстанның балаларды қорғау саласындағы саясатын жоғары бағалап отыр.
2024 жылдың көктемінде ЮНИСЕФ-тің Еуропа және Орталық Азия бойынша өңірлік директоры Реджина де Доминичис Қазақстанға сапары кезінде QR 111 – тәулігіне мыңға жуық бала көмек сұрайтын бірыңғай желі, буллинг, суицид пен зорлықтың алдын алуға бағытталған SAFE платформасы және балаларды қолдау бойынша институционалдық шаралар сияқты бастамалардың тиімділігін ерекше атап өтті. Оның айтуынша, Қазақстан тәжірибесін халықаралық деңгейде үлгі ретінде ұсыну маңызды.
