Облыста «Таза Қазақстан» бағдарламасы аясында аумақтарды жинау және ағаш отырғызу бойынша іс-шаралар жүйелі жалғасуда.
Атап айтсақ, Текеліде Қала күніне орай қалалық ардагерлер мен аналар кеңесінің мүшелері, қала жастары, сондай-ақ, жас спортшылар дене шынықтыру-сауықтыру кешенінің ауласына 50 түп ағаш көшетін отырғызды. Сонымен қатар, Алакөл ауданының Үшарал қаласында «Таза қала» сенбілігі ұйымдастырылды. Экологиялық акцияға 800-ге жуық қала тұрғыны қатысты. Сондай-ақ, Көксу ауданының экологиялық жағдайын жақсарту, экологиялық мәдениетті қалыптастыру және көгалдандыру мақсатында күзгі кезеңде ағаш отырғызу жұмыстары жандандырылды. Жаппай ағаш отырғызу акциясы ауданның 10 ауылдық округін қамтып, аудан әкімдігінің, ауылдық округ әкімдіктерінің, барлық мекемелер мен бөлімдердің қызметкерлері, кәсіпкерлер мен ерікті тұрғындарды қосқанда 300-ден астам адам қатысты. Шара барысында 512 түп жасыл желек отырғызды.
Облыс бойынша экологиялық акцияға 190 мыңнан астам тұрғын қатысты. Жұртшылық тарапынан зор қолдауға ие болған бағдарлама облыстың барлық аудандары мен қалаларын қамтыды.
«Таза Қазақстан» акциясы аясында облыста жалпы 1 411 техника жұмылдырылды. Соның нәтижесінде 7 408 тонна қоқыс шығарылып, 2 255 км. арық желісі тазаланды.
А. НАЗАРҰЛЫ
