Бейсен Құранбек атындағы Журналистер үйінде өткен брифингке «AMANAT» партиясының Жетісу облыстық филиалының төрағасы Арыстанғали Арын, Жетісу облыстық мәслихатының төрағасы Гүлнар Тойлыбаева, облыстық білім басқармасының басшысы Дәурен Жүнісов және облыстық қоғамдық кеңестің төрағасы Әсет Қыдырманов қатысып, өңірдегі білім беру жүйесінің ахуалы мен балалар қауіпсіздігіне қатысты өзекті мәселелерді талқы таразысына салды.
Баланың амандығы мен сапалы білім алуы қоғамның тірегі. Осы бағытта жүргізілген қоғамдық мониторинг нәтижелері нақты деректермен айқындалып, қордаланған түйткілді мәселелердің тіні тарқады.
Мәліметтерге сәйкес, 2025 жылы облыс көлеміндегі 443 білім беру мекемесі қамтылып, 162 белсенді азаматтың қатысуымен кешенді тексеріс жүргізілген. Нәтижесінде 56 мектептің 30 жылдан астам уақыт күрделі жөндеу көрмегені анықталған. Бұл өңірдегі білім инфрақұрылымының тозу деңгейін аңғартатын алаңдатарлық көрсеткіш.
Спикерлердің айтуынша, қауіпсіздік жүйесінде де олқылықтар бар. Үш жүзден астам бейнебақылау камерасының істен шыққаны белгілі болып, оқу орындарындағы бақылау тетіктерінің әлсіз тұстары айқындалды. Ал мектеп асханаларындағы ас сапасына қатысты шағымдардың азаюы жүргізілген бақылау шараларының нәтижесіз қалмағанын көрсетеді.
Жиында сөз алған облыстық мәслихат төрағасы Гүлнар Тойлыбаева балалардың амандығы – ортақ жауапкершілік екенін атап өтті. Оның айтуынша, алдағы кезеңде Жетісу облысында балаларға қатысты негізгі бағыттар бойынша кешенді мониторинг жалғасады. Негізгі назар білім беру ұйымдарындағы тамақтану сапасына, жол қауіпсіздігіне және инфрақұрылымның жай-күйіне аударылмақ.
– Бұл бағыттарға мемлекет тарапынан қомақты қаржы қарастырылған. Атап айтқанда, 2025 жылы балаларды тамақтандыруға 7,2 миллиард теңге бөлінсе, 2026 жылы бұл көрсеткіш 6,9 миллиард теңгені құрайды. Бір балаға бөлінетін қаражат көлемі өзгеріссіз қалып отыр: 1-4 сынып оқушыларына 630 теңге, 5-11 сыныптарға – 740 теңге. Қаржының аздап қысқаруы оқушылар санының өзгеруімен байланысты. Мәселен, 2025 жылы бастауыш сыныпта 43 095 бала білім алса, 2026 жылы олардың саны 41 114-ке дейін төмендеген. Сонымен қатар, 2026 жылы балалар қауіпсіздігін күшейту мақсатында нақты қаржылай қолдау көрсетілген. Атап айтқанда, арнайы күзет пен дабыл түймелеріне 666,9 миллион теңге, бейнебақылау жүйелеріне 34,4 миллион теңге, турникеттер орнатуға 56 миллион теңге, ал полицияның жедел басқару орталықтарына қосуға 627,3 миллион теңге бөлінген. Бұл көрсеткіштер қауіпсіздік мәселесінің сөз жүзінде қалмай, нақты іспен бекітіліп отырғанын аңғартады. Басты міндет – бөлінген қаражатты игеру емес, оның әр теңгесінің нақты нәтижеге жұмыс істеуін қамтамасыз ету. Алдағы мониторинг барысында әрбір мектеп пен балабақшадағы жағдай жан-жақты зерделеніп, халықтың талап-тілегі ескеріле отырып, нақты ұсыныстар әзірленеді, – дейді Гүлнар Қожағұлқызы.
Жиын барысында облыстық білім басқармасының басшысы Дәурен Жүнісов те білім беру мекемелеріндегі қауіпсіздік пен сапа мәселесі тұрақты бақылауда болатынын жеткізді. Оның айтуынша, жүргізіліп жатқан мониторинг нақты кемшіліктерді дер кезінде анықтап, оларды жүйелі түрде шешуге мүмкіндік беретін пәрменді құралға айналып келеді.
Алдағы мониторингтің екінші кезеңінде өткен жылы анықталған кемшіліктердің жойылу деңгейі сараланып, жаңа мәселелерге басымдық беріледі. Мектеп ішіндегі тәртіп, оқушылар арасындағы қарым-қатынас, буллингтің алдын алу, психологиялық ахуал, санитарлық талаптар мен материалдық-техникалық база кешенді түрде бағаланбақ.
Қоғамдық бақылау есеп – жауапкершілік жүгін арқалаған нақты іс. Баланың қауіпсіздігі мен білім сапасы шын мәнінде қамтамасыз етілгенде ғана ел ертеңі берік болмақ.
Санжар СҰЛТАНҒАЗЫ
