Соңғы жылдарда Жетісу облысында туризмді дамытуға бөлінген қаржы өңірдің даму бюджетінің шамамен 30%-ын құрады. Соның нәтижесінде аймақтағы туристік саласы тұрақты өсім көрсетуде. Мәселен, 2025 жылғы мониторинг бойынша өңірге келген туристер саны 11%-ға, оның ішінде шетелдік туристер саны 60%-ға, ал көрсетілген қызметтер көлемі 17%-ға өсіп, нөмірлік қор 23 мың төсек орынға жетті. Осы жөнінде және туризмді дамытуға бағытталған басқа да шаралар туралы Жетісу облысының әкімі Бейбіт Исабаев Премьер-Министр Олжас Бектеновтің төрағалығымен селектор режимінде өткен Үкімет отырысында айтты, — деп хабарлайды Жетісу облысы әкімінің баспасөз қызметі.
Өңір басшысының айтуынша, Жетісу облысының туристік дамуы 5 басым бағыттағы дестинацияларға негізделген. Олар – Алакөл мен Балқаш көлдері, «Алтынемел» және «Жоңғар Алатауы» ұлттық парктері, сондай-ақ Жоңғар Алатауы тау жотасы.
— Мемлекет басшысының тапсырмасына сәйкес облыста дербес Туризм басқармасы құрылды, 5 ауданда туризм бөлімдері ашылды. Алакөл мен Балқаш көлдерінің жағалауы аумақтарын тұрақты күтіп ұстау мақсатында «Алакөл Тазалық» және «Балқаш Тазалық» коммуналдық кәсіпорындары құрылды. Кәсіпорындарды материалдық-техникалық жағынан қамтамасыз ету үшін жергілікті бюджеттен бөлінген қаржыға 41 арнайы техника сатып алынды. Сондай-ақ суда жүзу құралдарының қозғалысын бақылауды күшейту және демалушылардың қауіпсіздігін үшін облыста Жалпы су пайдаланудың қағидалары бекітілді, — деп атап өтті Б.Исабаев.
Өз сөзінде облыс әкімі Алакөл және Балқаш көлдерінің жағалауында инфрақұрылымды дамыту шараларына да назар аударды. Сол сияқты экологиялық туризмді дамыту мәселесіне де тоқталды. Сөзінің қорытындысында Бейбіт Исабаев облыста туризмді дамыту және туристерге жағдай жасау жұмыстары тұрақты бақылауда екенін жеткізді.
