Отбасы – қоғамның алтын діңгегі. Тұрақты отбасы – мемлекеттің мықтылығының кепілі. Сондықтан отбасындағы татулық пен өзара сыйластықты сақтау, тұрмыстық зорлық-зомбылықтың алдын алу – бәріміздің ортақ міндетіміз.
Облысымызда бұл бағытта нақты нәтижеге бағытталған жүйелі жұмыстар атқарылып келеді. Мемлекет басшысы Қасым-Жомарт Тоқаев отбасылық құндылықтарды нығайту мен әлеуметтік әлсіз топтарды қорғауды мемлекеттің басым бағыты ретінде атап өткен болатын. Осы мақсатта біздің басқарма өңірдегі отбасыларды жан-жақты қолдау, қиын өмірлік жағдайға тап болған азаматтарға көмек көрсетуде бірқатар жобаларды жүзеге асыруда.
Бүгінде облыстың барлық ауданында «Жанұя» отбасын қолдау орталықтары жұмыс істейді. Бұл орталықтар – өмірлік қиын жағдайға тап болған азаматтарға қолдау көрсететін, дағдарыстан шығуға бағыт-бағдар беретін әлеуметтік мекемелер.
Жыл басынан бері 425 отбасы немесе 1120 адам орталықтардан әлеуметтік, психологиялық және құқықтық көмек алды. 42 азамат тұрақты жұмысқа орналастырылды, 20 отбасы тұрғын үй кезегіне тұрғызылды, ал 133 отбасы демеушілер көмегімен азық-түлік пен тұрмыстық қажетті заттармен қамтамасыз етілді.
Біз үшін басты міндет – әр отбасының тағдырына бейжай қарамау. Сол себепті барлық аудандарда мобильдік топтар құрылып, олар өмірлік қиын жағдайда қалған азаматтарды ерте анықтап, дер кезінде көмек көрсетуде.
Биылдан бастап «Жанұя» орталықтарында FSM Social атты ақпараттық жүйе енгізілді. Бұл – цифрлық әлеуметтік саясаттың жаңа қадамы. Жүйе арқылы әр отбасының әлеуметтік жағдайы тіркеліп, көрсетілген көмек пен нәтижелер нақты бақыланады.
FSM Social бізге ашықтық пен тиімділікті арттырады. Бұл – мемлекет тарапынан көрсетілетін әлеуметтік қызметтердің сапасын жаңа деңгейге көтерудің бір жолы. Талдықорған қаласында 2023 жылдан бері «Тұрмыстық зорлық-зомбылық құрбандарына әлеуметтік көмек көрсету орталығы» жұмыс істейді. Мұнда әйелдер мен балалар үшін қауіпсіз жағдай жасалған. Биылдың өзінде орталық 120 адамға көмек көрсетті. Оның ішінде 31 әйел және 89 бала бар. 5 адам жұмысқа орналастырылды, 5 азаматтың құжаттары қалпына келтірілді, 18 адамға қорғау нұсқамасы берілді.
Біздің мақсат – тек көмек көрсету ғана емес, ең алдымен зорлық-зомбылықтың алдын алу. Осы бағытта облыс бойынша түсіндіру және ақпараттық жұмыстар күшейтілді. Түрлі мәдени ошақтар мен оқу орындарында, еңбек ұжымдарында кездесулер, семинарлар, тренингтер өткізілуде.
Бикен Римова атындағы драма театр әртістерімен бірлесе отырып, отбасылық зорлықтың салдарын бейнелейтін бейнероликтер түсірілді. Мұндай жұмыстар халықтың санасына ой салып, қоғамда зорлық-зомбылыққа төзбеушілік мәдениетін қалыптастыруға сеп болуда.
Отбасы амандығы – ел тыныштығының кепілі. Біз әр азаматтың қауіпсіздігін, әр баланың болашағын қорғауға міндеттіміз.
Мемлекет пен қоғамның бірігуі арқылы ғана біз зорлық-зомбылықсыз, берекелі, мейірімге толы қоғам құра аламыз.
Ермек Мизамбаев,
Жетісу облыстық жұмыспен қамтуды үйлестіру және
әлеуметтік бағдарламалар басқармасының басшысы
