ҚР еңбек және халықты әлеуметтік қорғау вице-министрі Асқарбек Ертаев Жетісу облысына арнайы жұмыс сапарымен келді. Ол алдымен облыс орталығында орналасқан бірқатар әлеуметтік орталықтарға ат басын бұрып, тіршілігімен танысты.
Ең алдымен «Асар» мүгедектерге арналған спорттық-оңалту орталығының базасына барған вице-министр ондағы жұмыс барысына жіті назар аударды.
Тірліктің үлкен сынағына душар болып өз бетінше жүріп-тұру мүмкіндігінен айырылғандар мен он екі мүшесінің бірі қимылсыз қалған, апат салдарынан арбаға таңылғандар мен инсульт секілді тосыннан келген дерттен оңалудың жолын іздеген жандардың жаттығуын, арнайы ем қабылдау сәтін көрді. Жарық ғаламда жанына дәру іздеген жандармен пікірлесті, қолдау білдірді. Өз кезегінде аталған орталықтың директоры Елдос Баялышбаев спорттық-оңалту орталығының іргетасы қаланған күннен бүгінге дейінгі жеткен жетістігін баяндаса, орталықтың аға үйлестірушісі Өмірсерік Шериаздан емделушілердің жаттығу залындағы құрылғыларды таныстырды.
Өз кезегінде Талдықорған қаласында орналасқан белсенді ұзақ өмір сүру, тұрмыстық зорлық-зомбылық құрбандарына әлеуметтік көмек көрсету, «Жанұя» отбасылық қолдау орталығы секілді бірқатар мекеменің жұмысымен танысқан ҚР Еңбек және халықты әлеуметтік қорғау вице-министрі Асқарбек Ертаев:
– Орталықтардың бәрі өз бағытында жұмыс істеп жатыр, көпке көмек қолын созуда. Солардың ішінде «Асар» мүгедектерге арналған спорттық-оңалту орталығының жұмысы ерекше қуантты. Мұнда өмірдің жарығына, жақсылығына ұмтылған жігерлі жандар күресуде. Бүгінге дейін Үкіметпен қатар шетелден де қолдау тауып, арнайы гранттар ұтқан осындай орталық қатары өзге өңірлерде көбеюі тиіс, – деп атап өтті.
Асыл СҰЛТАНҒАЗЫ
