Биыл белгілі қоғам қайраткері, қазақ журналистикасында өзіндік қолтаңбасын қалдырған публицист, жазушы Кәкімжан Қазыбаевтың туғанына 95 жыл. Атаулы мерейтой аясында Бақалы ауылында жан жадыратар жаңалықтар жүзеге асуда.
Соның бірі – аталмыш елді мекендегі жазушының есімі берілген білім шаңырағына жүргізіліп жатқан жөндеу жұмысы.
– 1980 жылы қабырғасы қаланып, 640 балаға лайықталған мектепте қазіргі таңда 271 оқушы білім алады. Сонымен қатар, 75 бүлдіршін шағын орталықта тәрбиеленсе, 18 балдырған мектепалды даярлық сыныбына барады, – дейді мектеп директоры Назерке Құтбаева.
Жөндеу жұмысын Алматы қаласындағы «КДК-Строй» ЖШС жүргізуде. Облыстық бюджеттен бөлінген 101 млн. теңгеге лайықталған құрылыс жұмысы екі кезеңге бөлініп атқарылуда. Алдымен ескі ағаш едендер түгелдей алынып, бетон құйылмақ. Көнерген бояулы әкті қабырға қырылып, заман талабына сәйкес сыланып, білім ордасын жаңаша жаңғыртпақ.
Ең бастысы, 15 шілдеде басталған құрылыс жұмысы сапалы жүргізіліп, Білім күні қарсаңында пайдалануға берілсе деген мәселе.
Жақсылық ЖОМАРТҰЛЫ
Сарқан ауданы
