2026 жылғы 1 наурыздағы жағдай бойынша мемлекеттік еңбек инспекторлары республикадағы еңбек заңнамасының сақталуына қатысты ауқымды тексерулер қорытындысын жариялады. Тексерулер нәтижесінде еліміздің 102 кәсіпорны 408 жұмыскерге 284 млн теңге көлемінде жалақы қарыз екені анықталды, – деп хабарлайды 7-su.kz ақпараттық порталы.
ҚР Еңбек және халықты әлеуметтік қорғау министрлігінің мәліметінше еңбек құқығының бұзылуына жол берген кәсіпорын басшыларына қатысты қатаң шаралар қабылданды. Атап айтқанда, орындауға міндетті 707 ұйғарым беріліп, 89 млн теңгеден астам сомаға айыппұл салынды. Қабылданған шаралар мен жалақы берешегін өтеудің арнайы кестелерінің арқасында 354 жұмыскердің құқығы қорғалып, оларға тиесілі 253 млн теңге қайтарылды.
Жыл басынан бері жүргізілген 1125 тексеру барысында барлығы 1228 заң бұзушылық тіркелді. Олардың ішінде еңбек саласына қатысты 1055 дерек, еңбек қауіпсіздігі мен қорғау бойынша 161 факт және халықты жұмыспен қамту бағытында 12 заңсыздық анықталған. Жалпы алғанда, мемлекеттік бақылаудың нәтижесінде 11 354 жұмыскердің конституциялық еңбек құқықтары толықтай қалпына келтірілді.
Министрлік еңбек заңнамасының сақталуын қамтамасыз ету мәселесін ерекше бақылауда ұстап отыр. Мұндай тексерулер кәсіпорындардағы еңбек қатынастарын реттеуге және жұмыс берушілердің жауапкершілігін арттыруға бағытталған.
