Испанияның Ла-Нусия қаласында өтіп жатқан «Boxam Elite» халықаралық турнирінде қазақстандық боксшы Айбек Оралбай жартылай финалға жолдама алды, – деп хабарлайды 7-su.kz ақпараттық порталы Tengri Sport сайтына сілтеме жасап.
90 келіден жоғары салмақ дәрежесінде сынға түскен отандасымыз ширек финалда Ұлыбритания өкілі Мат Уилямспен қолғап түйістірді. Тартысты өткен жекпе-жек нәтижесінде Айбек Оралбай қарсыласын 4:1 есебімен қапы қалдырып, жарыстың келесі кезеңіне өтті. Бұл жеңіс боксшымызға турнирдің кем дегенде қола жүлдесін иеленуге мүмкіндік беріп отыр.
Айбек Оралбай – қазақ боксының жарық жұлдыздарының бірі. Ол 2025 жылғы әлем чемпионы, Азияның екі дүркін чемпионы (2022-2024 жылдар) және Қазақстанның көп дүркін жеңімпазы атағына ие. Оның бұл жеңісі Испания төріндегі қазақ құрамасының беделін тағы бір биіктетті.
Айта кетейік, аталған турнирдің жартылай финалына Айбекпен бірге тағы бірнеше қазақстандық былғары қолғап шебері шықты:
-
Аман Қонысбеков (75 келіге дейін);
-
Махмуд Сабырхан (55 келі);
-
Тимур Нұрсейітов (75 келі);
-
Сағындық Тоғамбай (90 келі);
-
Асылхан Нұрасыл (90 келіден жоғары).
Өкінішке қарай, 55 келідегі Бексұлтан Боранбек пен 60 келі салмақтағы Серік Теміржанов өз жекпе-жектерінде есе жіберіп, жарыс жолынан шығып қалды. 3-8 ақпан аралығында өтетін «Boxam Elite 2026» халықаралық турнирінде ерлер мен әйелдер арасында мықтылар анықталып жатыр.
