«Алтын-Емел» мемлекеттік ұлттық табиғи саябағындағы жабайы жануарларды санау аяқталды.
Онда құлан саны 3 жарым мыңнан, тау ешкісі 6 мыңнан асты. Ерекше қорғалатын аймақ қызметкерлері жыл сайын санақ жұмыстарын жүргізеді. Бұл үшін оларға 14 арнайы автокөлік пен ат бағыттары қарастырылған.
Бұдан басқа, фото тұзақтардың көмегімен қызыл кітаптағы тау ешкілері мен арқарлардың көбею қарқынына бақылау жүргізіледі. GPS-навигаторлардың арқасында қар барысының тіршілік ету аймағы да назарда. Сирек кездесетін жыртқыш фотоқақпанға алғаш рет 6 жыл бұрын түскен. Қазір оның ұлттық саябақтағы көбеюі 20 басқа дейін өскен.
«Алтын-Емел» мемлекеттік ұлттық табиғи саябағының директоры Қуат Байтұрбаевтың айтуынша, жабайы жануарлардың жыл сайынғы өсімін анықтау және жемшөп қорының әлеуетін анықтау үшін санақ жүргізіледі.
Ұлттық саябақтың аумағы 307 жа- рым мың гектардан асады, сондай-ақ, 240 мың гектар жоғарғы Көксу қорығы да бекітілген. Бүгінде жануарлардың мекен ету жағдайын жақсартудың арқасында жабайы тіршілік иелерінің тұрақты өсуі байқалуда.
Айгүл Байжұмақызы
Кербұлақ ауданы
