Биыл «Жұмысшы мамандықтар жылы» деп жарияланды. Бұл экономиканың тұрақты дамуын қамтамасыз ететін жандардың еңбегін мойындаудағы маңызды қадам.
Солардың бірі «Party Food» компаниясының қызметкері Ақмарал Супжанова. Ол жастардың сүйікті тағамына айналған пицца мен фаст-фуд өндірісіне маманданған жан. Өзіне жүктелген міндетті адал атқаруға машықтанған кейіпкеріміз бұл компанияға 5 жыл бұрын келген.
Сөйтіп, ұн цехындағы жұмысты атқара жүріп, өзінің жан-жақтылығы мен жаңа нәрселерді үйренуге құштарлығын дәлелдей білді. Кейіннен ет цехындағы істерді де меңгеріп, бүгінде цех бригадирі атанды. Сонымен бірге бүкіл өндірістік үдерісті ұйымдастырып, өнім сапасын бақылайды.
– Тамақ пісіруді бала кезімнен жақсы көремін. Уақытымның көп бөлігі ас бөлмесінде өтеді. Кейіннен өмірімді тағам әзірлеу ісімен байланыстырғым келетінін түсіндім. Өндірісте адамдарға ұнайтын дәмді ас әзірлеуден ләззат аламын. Бұл үлкен жауапкершілік әрі ол маған шабыт сыйлайды, – дейді Ақмарал Супжанова.
Оның еңбегі кәсіпқойлықтың өз ісіне деген сүйіспеншіліктен басталатынын байқатты. Сондай-ақ, мамандықты құрметтеу, жан-жақты ойлау, өзін-өзі жетілдіруге ұмтылу кейіпкерімізді «Party Food» компаниясы ұжымының сүйікті қызметкеріне айналдырды.
– Ақмарал Супжанованың мұндай ісі жұмысшы маман иелерінің жан-жақты дамуға болатын жол екенін көрсетеді. Біз бұл туралы жиі айтып, осы арқылы көпшілікті еңбекті сүюге, құрметтеуге баулуымыз керек. Өйткені, экономиканың дамуы осындай істердің атқарылуымен тығыз байланысты. Ақмаралдың еңбек жолы адамдарға табандылық, іскерлік, дамуға ұмтылыс, көшбасшы болу сынды биіктерге көтерілуге серпіліс беретін мысалдың бірі, – дейді облыстық кәсіпкерлер палатасының директоры Дәурен Оңалбаев.
Жұмысшы мамандықтар – экономикалық тұрақтылық пен ел болашағының негізі. Осындай әр істің соңында Ақмарал секілді талай адамның еңбегі жатыр. Сондықтан, ол қайнаған тірлік пен өмірдің мәні саналады.
Айгүл БАЙБОСЫНОВА
