Қазақстан телерадиокорпорациясы 2026 жылғы футболдан әлем чемпионаты матчтарын ел аумағында көрсету құқығын ресми түрде сатып алды. Отандық жанкүйерлер төрт жылдың басты додасын Qazaqstan және Qazsport телеарналары арқылы тікелей эфирде тамашалай алады. Сонымен қатар онлайн трансляциялар Qazaqstan.tv, Qazsporttv.kz сайттарында, сондай-ақ арнайы мобильді қосымша мен Birge.tv платформасы арқылы қолжетімді болады, – деп хабарлайды 7-su.kz ақпараттық порталы Vesti.kz сайтына сілтеме жасап.
Биылғы дүниежүзілік дода 11 маусым мен 19 шілде аралығында өтеді деп жоспарланған. Футбол тарихында тұңғыш рет мундиал бір мезетте үш елдің, атап айтқанда АҚШ, Канада және Мексика стадиондарында ұйымдастырылады. Тағы бір тарихи ерекшелік биылғы біріншілікке алғаш рет 48 ұлттық құрама қатысады. Осылайша жанкүйерлер бұрын-соңды болмаған тартысты әрі ауқымды футбол мерекесінің куәсі атанбақ.
Жарыс шарты бойынша 48 команда төрт құрамадан 12 топқа бөлінген. Плей-офф кезеңіне әр топтан үздік нәтиже көрсеткен екі командамен бірге үшінші орын алған ең үздік сегіз құрама жолдама алады. Жаңа ережеге сай доданың плей-офф кезеңі бірден 1/16 финалдан басталады және бұл сынға 32 құрама жолдама алады. Әр кезеңде командалар бір ғана матч өткізіп, жеңілгені жарыс жолынан шығып отырады.
Топтардың құрамы да өте тартысты қалыптасқан. Мәселен К тобында көршілес Өзбекстан құрамасы Португалия, Колумбия және Конго Демократиялық Республикасымен күш сынасады. А тобында турнир қожайыны Мексика ОАР, Оңтүстік Корея және Чехиямен кездессе, D тобында АҚШ құрамасы Парагвай, Австралия және Түркиямен шеберлік байқасады. Футбол жанкүйерлері үшін бұл жаз нағыз спорттық шоуға толы болмақ.
