Футзалдан ел чемпионатының екінші айналымы басталды. Үздіктер плей-офф сатысында өз орнын анықтау үшін, ал аутсайдерлер турнирлік кестенің төменгі жағынан жоғарлау мақсатында әр ұпай үшін барын салып жатыр. «Атырауға» қонаққа барған «Жетісу» футзал клубы бірінші ойын күні 2:1 есебімен жеңіп, келесі күні 1:10 нәтижесімен жеңілді. Екінші ойын күнінде «Атырау» сапында ойнайтын 19 жастағы жетісулық Әлімжан Сейітнұр «Жетісу» қақпасына 47 секундта хет-трик орындады (ойынның 30 минутында).
Оқи отырыңыз: Әлімжанның әлемімен танысқыңыз келсе
«Жетісу» футзал клубының түлегі, Қазақстан жастар құрамасының шабуылшысы Әлімжан Сейітнұр биылғы маусымда екінші мәрте хет-трик (үш гол) жасап отыр. Осының алдында «Бәйтерек» қақпасына үш гол салды.
Жақсылық Байсариев жаттықтыратын «Атырау» сапына маусым басында қосылған Әлімжан 28 ойында 12 гол салып, 3 пас берді (алда әлі 16 ойын бар). Былтыр «Жетісу» сапында маусымды 3 голмен аяқтаған еді.
– «Жетісу» футзал клубының сапында екі жыл жаттықтым. Талдықорған футболының түлегімін. Маусым басында «Атыраудан» ұсыныс түсіп, өзімді сынап көргім келді. Команда жақсы қабылдады, әркез қолдау білдіріп отырады. Осымен шектеліп қалғым келмейді, командамыздың әр жеңісіне өз үлесімді қосқым келеді, – дейді Әлімжан Сейітнұр.
Дәл қазір «Атырау» турнирлік кестеде 28 ойыннан кейін 53 ұпаймен 5-орында тұр. Алдында «Аят» (28 ойын, 54 ұпай) бар. Ал «Жетісу» 13 ұпай жинап 11-орында, одан кейін «Шымкент» (10 ұпай) өкішелеп келеді.
Серік ҚАНТАЙ
