Қазақстандық дзюдошы Әбиба Әбужақынова 48 келіге дейінгі салмақ дәрежесінде әлемдік рейтингте бірінші орынға шықты. 2025 жылдың қорытындысы бойынша отандасымыз өз салмағында планетаның ең үздік спортшысы атанды, – деп хабарлайды 7-su.kz ақпараттық порталы.
Халықаралық дзюдо федерациясының (IJF) жаңартылған мәліметтеріне сәйкес, 28 жастағы Әбиба Әбужақынованың қоржынында 5096 ұпай бар. Ол Жапонияда өткен маңызды Grand Slam турниріне қатыспаса да, жинаған ұпай қоры оның көшбасшылығын сақтап қалуға толық жеткілікті болды.
Әлемдік рейтингтегі алғашқы үштік төмендегідей:
-
Әбиба Әбужақынова (Қазақстан) – 5096 ұпай;
-
Тара Бабулфат (Швеция) – Олимпиаданың қола жүлдегері;
-
Сабина Гялязова (Ресей).
Әбиба үшін бұл маусым өте нәтижелі болды. Жыл бойы ол тұрақты өнер көрсетіп, бірнеше маңызды белесті бағындырды:
-
Әлем чемпионатының күміс жүлдесі;
-
Аустрияда өткен Гран-при кезеңіндегі жеңіс;
-
Grand Slam турнирлерінің екі қола медалі.
Айта кетерлігі, Қазақстан құрамасынан әлемдік ондыққа (Top-10) басқа спортшылар ене алмады. Олимп шыңына ең жақын тұрған Ғұсман Қырғызбаев (66 келі) пен Абылайхан Жұбаназар (81 келі) 14-сатыға жайғасқан.
Париж Олимпиадасында жүлде бұйырмағанына қарамастан, Әбибаның әлемдік рейтингтегі бірінші орны – оның жоғары шеберлігі мен қажырлы еңбегінің айқын дәлелі. Бұл жеңіс еліміздегі әйелдер дзюдосының қарқынды дамып келе жатқанын көрсетеді.
