Талдықорған қаласындағы 37-ші десанттық-шабуылдау бригадасының базасында «Әкем, анам және мен – спорттық отбасы» атты спорттық мереке өтті.
Гарнизондық деңгейде ұйымдастырылған шараға Жетісу гарнизонына қарасты бірнеше әскери бөлімнің әскери қызметшілері мен олардың отбасы мүшелері қатысты. Іс-шараны 18404 әскери бөлімінің әскери қызметшілердің отбасы мүшелерімен жұмысты ұйымдастыру қызметінің жетекшісі Айсұлу Джумакеева басқарып, «Жетісу облысының бұқаралық спортты дамыту және спорттық іс-шараларды өткізу спорт клубы» Талдықорған қалалық филиалы қолдау көрсетті.
Спорттық мереке барысында отбасылық командалар көңілді эстафеталарға қатысып, өздерінің шапшаңдығы мен ептілігін, ұйымшылдығы мен командалық рухын көрсетті. Ата-аналар мен балалар бір команда болып, өзара қолдау мен достық бәсекелестік жағдайында бақ сынасты.
Шараның басты мақсаты – әскери қызметшілердің отбасыларын спортқа баулу, салауатты өмір салтын насихаттау және отбасылық бірлікті нығайту.
Көтеріңкі көңіл-күй мен жағымды эмоцияға толы спорттық мереке қатысушыларға ерекше әсер сыйлап, отбасылық дәстүрлерді нығайтуға өз үлесін қосты.
Барлық қатысушыларға белсенділіктері мен спорттық рухтары үшін алғыс білдіреміз! Отбасыларыңызға амандық, мықты денсаулық, бақ-береке және әрдайым жеңіс тілейміз!
Жетісу гарнизонының баспасөз қызметі
