«Жастар» спорт сарайында волейболдан ардагерлер арасында ІІІ халықаралық «Жетісу кубогы» турнирі жалауын желбіретті.
Дәстүрге айналған волейбол додасына Ресей Федерациясының Бурятия, Тыва, Татарстан Республикаларынан және Орынбор қаласынан, сондай-ақ, Қырғызстан, Моңғолия, Өзбекстан елдерінен кіл мықты командалар келді. Халықаралық жарысқа Алматы облысының «Жетісу» командасы да қатысуда.
— Биыл үшінші мәрте өтіп отырған ардагерлер арасындағы волейболдан халықаралық турнир жыл сайын ауқымын кеңейтіп келеді. Талдықорған қаласы волейбол ойынының үлкен ордасына айналды. Жалпы, Алматы облысы ғана емес, Қазақстанның волейболы әлемге танымал. Сол кездегі «Буревестник», «Дорожник» командасы екі мәрте Еуропа кубогының иегері, КСРО чемпионы атанды. Сондай-ақ, О.Жарылғаповтан тәлім алған Ж.Сауранбаев, Г.Гончаров, В.Кравченко, А.Сұлтанов, А.Шабдарбаев, В.Шапран секілді спорт шеберлері Қазақстан волейболын дүниежүзіне танытты. Біз олармен мақтанамыз. Осындай таланттарымызды мақтан тұта отырып, біз кейінгі жас ұрпаққа үлгі көрсетуіміз керек және насихаттауымыз керек. Сол себепті де Талдықорған қаласында ардагерлер арасында волейбол турнирін өткізіп келеміз. «Жетісу кубогы» турниріне қатысушылар қатары артуда. Қазірдің өзінде сегіз мемлекеттен келді. Қытай, Тайланд елінің командалары ұсыныс білдірді. Болашақта ол елдердің де командаларын осы жарыстан көретін боламыз. Олай болса, жарысқа келген барлық командаға сәттілік! Тек мықтылар жеңіске жетсін! – деді Амандық Ғаббасұлы.
Осылайша сөзін аяқтаған облыс басшысы жарысты ашық деп жариялады. Одан кейін ортаға «Буревестник» Волейбол клубының президенті, генерал-лейтенант Амангелді Шабдарбаев, Тыва Республикасы Волейбол федерациясының вице-президенті Чингис Каминов, Моңғол Республикасы Волейбол федерациясының вице-президенті, волейболдан спорт шебері Тутсмандалу Тогтохбаыр, Татарстан Республикасы «Динамо» қоғамы төрағасының бірінші орынбасары Гайсин Салават сөз сөйлеп, жарысты ұйымдастырушы облыс әкімі Амандық Баталовқа алғыстарын айтып, ескерткіш сыйлықтарын табыс етті.
Салтанатты шарадан кейін «Жетісу» мен Тыва Республикасының командалары кездесті. Кілең ардагер ойыншылардан құралған команда әуе допты ұршықша иірді. Бір-біріне дес бермеген ойыншылар жарыстың көрігін қыздырды. Ойыншылар жанкүйерлердің делебесін қоздырып, сұрапыл соққыларымен шеберлік танытты. Нәтижесінде, «Жетісу» командасы екі сәтте де жеңіске жетіп, қоржындарына алғашқы ұпайды салды. Екінші ойын Өзбекстан командасымен болды. Ол ойын да, жерлестеріміздің пайдасына шешілді. Есеп 2:0.
Ришад ТҰРҒАНБАЕВ
Фото — Серік ҚАНТАЙ
Алматы облысы
