Жуырда ел намысын қорғап жүрген былғары қолғап шебері, кәсіпқой бокстан Кариб аймағының үздігі, әлем чемпионы, «WBA FEDELATION», «WBO INTERCONTINENTAL» тұжырымдарының жеңімпазы, алты Алаштың атағын алты құрлыққа әйгілі еткен Қанат Исламмен ауданымыздағы белгілі бапкер Арнұр Нұрланұлының тәрбиеленушілері кездесті.
Сонымен қатар шараға греплинг күресінен Азия чемпионатының күміс, әлем біріншілігінің қола жүлдегері Жомарт Болатханұлы, ұлттық жекпе-жек, джиу-джитсудан Қазақстанның бірнеше дүркін чемпионы, Азияның күміс медалінің иегері Айбол Ахметов, джиу-джитсудан Қазақстан чемпиондары Илияс Раписбай, Алихан Тұрақын, Асылбек Садырбектер қатысты.
Айтулы бас қосу Жыланды ауылында өтті. Сұхбаттасу барысында Қанат Ислам спорт сөзінің астарында терең түсінік, мән-мағына жатқандығын, бұл тек деннің саулығы мен адам күшін ұлғайту үшін ғана емес, сонымен қатар, ойлау қабілетті дамытып, сананың салмақтана түсуіне септігін тигізетінін жеткізді. Биік-биік белдерден, асқар-асқар таулардан тұғырлы тұлғаңды көрсетіп, көк Туыңды өзге мемлекеттің аумағында желбіретудің де ең бейбітшіл мүмкіндігі – спорттық ойындар екендігін де естен шығармады.
«Қазақ» деген лақап атты иемденген Қанаттың сөйлеу мәнеріне қарап отырып та таң болдық. Орысшасы жоқ, алтын құрсақты анасының ақ сүтімен сіңген тіліне дақ түсірмеген. Тек қазақша көсілуде. Мәнді мақалдар мен мәйекті мәтелдер араластырып, жастардың ой-өрісін дамытуға да өзіндік үлес қосқандай көрінді.
«Ықылым замандарда, дала кезіп, дара тірлік кешкен қазақ үшін қауіп-қатердің мол болғандығы анық. Сол кезеңдерде хас батырларымыз аттың жалында, түйенің қомында өмір кешсе де туралық жолынан тайып көрмеді, жекпе-жекке шыққанда тақымындағы тұлпарынан құлату да оңай болмайтын. Нағыз спорт солардікі. Рухтары да тасыған, күштері алапат. Сол уақыттарда құрсағына қондырып, тал бесіктен талмай баққан аналар: «Майданға аттанғанда жауыңның жебесі артыңнан тисе, ақ сүтімді ақтағаның, алдыңнан тисе, арымды таптағаның», – деп жіберетін. Міне осыдан кейін тұрқының өзі тұла-бойыңды тітіркендіріп, жау қолын қоғаша жапырған бабаларымыз ұлан-ғайыр жерімізді ұрпақтарына аманат етті. Спорт та осы секілді. Шаршы алаңға шыққанда елдің намысы, жердің намысы, ең алдымен бағып-қаққан ата-анаңның ары сенің мойныңда. Осыны естен шығармасаңдар, еркелікті доғарып, бапкерлерің айтқандай, байыппен дайындалып, жаттығуды қалдырмасаңдар Қазақстанның абыройын арқалап, дүниежүзін таңдай қақтырған дарабоздар атанасыңдар», – деп сөзін аяқтаған Қанат Ислам жастардың жүрек қылын қозғап, олардың спортқа деген құлшынысына дем берді. Чемпионмен жолығу бақыты бұйырған балалар да түрлі сауалын қойып, сұхбаттасу барысында көкейде іркілген көптеген тақырып талқыланды.
Алмат ЕСЕНБЕКОВ
