Ескелді ауданы Қарабұлақ ауылындағы денешынықтыру-сауықтыру кешенінде Қазақстан Республикасы Тәуелсіздігінің 30 жылдығына орай «Karabulak open – 2021» шахмат турнирі өтті.
Іс-шараның мақсаты – Алматы облысында шахмат ойынын танымал ету және дамыту, шахматшылардың спорттық шеберлігін арттыру, саламатты өмір салтын насихаттау. Шахмат сайысына Тәжік-стан, Өзбекстан, Алматы, Атырау, Нұр-Сұлтан және Алматы облысының Райымбек, Қарасай, Ескелді, Көксу аудандары, Талдықорған, Текелі қалаларынан жалпы саны 105 адам қатысты. Жарыс жүлдесі 500 мың теңгені құрады. Ескелді ауданының әкімі Рустам Әли құттықтау сөз сөйлеп, жарысқа қатысушыларға сәттілік тілеп, алғашқы жүрісті бастап берді.
Осы сайыста Александр Тюляндин баптайтын Қаратал аудандық балалар және жасөспірімдер спорт мектебінің жас шахматшылары өз өнерлерін көрсетті. Турнирде сайысқа қатысушылар жас ерекшелігіне, біліктілігіне, рейтингісіне қарамастан бірге ойнады. Жарысқа қатысушылар FIDE ережелері бойынша реттелетін «Swiss-manager» швейцариялық жүйесі негізінде 9 тур бойынша сайысқа түсті. Әрбір қатысушыға ойынның соңына дейін алғашқы жүрістен бастап әрбір жүріс үшін 8 минутқа қосымша 2 секунд қосылып отырды. Байқау жеңімпазы ең жоғары ұпай бойынша анықталды. Екі немесе одан да көп қатысушылардың ұпайлары тең болған жағдайда Бухгольц коэффициенті, жеңістер саны, прогресс коэффициенті, жеке кездесудің нәтижесі бойынша шығарылды.
Сайыс қорытындысы бойынша үштөбелік шахматшылар тамаша ойын өрнегін көрсетіп, жақсы нәтижеге қол жеткізді. Қыздар арасында топ жарған Аида Жанатбек жүлделі 3-орынға қол жеткізді. Ардагерлер арасында ойнаған Александр Тюляндин 2-орын иегері атанды. Ерекше айта кетерлігі, шахматшы Ерназар Исумбаев 105 ойыншының ішінде үздік 5-орынға жайғасып, арнайы қаржылай сыйлыққа ие болды. Бір айта кетерлігі, осынау турнирге Нұр-Сұлтан қаласынан гросмейстер Нұрлан Ибраев, халықаралық шеберлер: Тәжікстаннан Мұхаммед Хусенходжаев, Алматы қаласынан Рамазан Жалмаханов, Фиде шеберлері: өзбекстандық Азамат Даиримбетов, Алматы облысынан Ален Рақымжан, әйелдер арасындағы Фиде шебері, алматылық Әлия Нұрманова секілді кіл мықтылардың қатысуынан турнир деңгейінің аса жоғары болғанын байқаймыз. Үштөбелік шахматшы Ерназар Исумбаев ұпай саны бойынша тіпті кейбір халықаралық шеберлерден басым түсті. Мұны жас шахматшының қажырлы еңбегі мен жеңіске деген ерік-жігері дегеніміз абзал.
Біз қараталдық шахматшыларды табысымен құттықтап, байрақты бәсекелерде аудан намысын абыроймен қорғап, жетістікке жетулеріне тілектестік білдіреміз.
А. Өмірбаев
