Үшінші мәрте қысқы төрт жылдықтың басты додасын қабылдаған Италия (осыған дейін 1956 жылы Кортина-д Ампеццода, 2006 жылы Туринде өтті) Олимпиада тарихында тұңғыш рет әлемдік доданы ресми екі қалада өткізді (Милан мен Кортина-д Амеццода). Елімізден барған 36 спортшы (10 спорт түрінен қатысты) 25-ші қысқы Олимпиада ойындарын 1 алтынмен 19-орында аяқтады. 1994 жылы Лиллехамерде (Норвегия) 50 шақырым қашықтыққа шаңғымен жүгіруден алтын алған Владимир Смирновтан кейін, араға 32 жыл салып, Қазақстан құрамасына алтын медаль бұйырды. Мәнерлеп сырғанаудан сынға түскен Михаил Шайдоровтың жеңісі күллі қазақ жұртын бір серпілткені анық.
Олимпиада чемпионы Михаил Шайдоров елге келгенде Мемлекет басшысы Қасым-Жомарт Тоқаев қабылдап, ІІ дәрежелі «Барыс» орденімен, оның бапкері Алексей Урмановты ІІ дәрежелі «Достық» орденімен және мәнерлеп сырғанаудан Қазақстан Ұлттық құрамасының бапкері Әсем Қасанованы «Құрмет» орденімен марапаттады.
– Олимпиада алтынымен шектеліп қалғым келмейді. Әлі талай жарыста топ жарып өз елімді танытып, кейінгі жастарға үлгі болғым келеді. Сол үшін еңбектене беремін. Өзімнің сүйікті елім үшін барымды сала-мын, – деді Михаил Шайдоров Мемлекет басшысының алдында.
Михаил Шайдоров – үш айналым аксель, ойлер, төрт айналым сальхов секірген тарихтағы тұңғыш мәнерлеп сырғанаушы. Ол жалпы қысқа бағдарламада 92.94 ұпай (5-орын), негізгі бағдарламада 198,64 ұпай алып, жалпы 291,58 ұпай жинап (бұл мәнерлеп сырғанаушының жеке рекорды) Олимпиада чемпионы атанды. Одан кейінгі орындарға жапониялықтар Юма Кагияма мен (103,07 + 176,99 – 280,06 ұпай) Сюн Сато (88,70+186,20 – 274,90 ұпай) ие болды.
Артынша мұз айдында ерекше өнер көрсеткен 19 жастағы мәнерлеп сырғанаушы Софья Самоделкина қысқа бағдарламада екі аксель, үш луц, үш флип және үш тулуп каскадын таза орындап, 68,47 ұпай алып, 12-орынға орналасты. Ал еркін бағдарламада 138.99 ұпай алып (жалпы 207.46 ұпай) жарысты үздік ондықта (10-орын) аяқтады. Бұл Софьяның жеке рекорды.
Мәнерлеп сырғанаушыларды жанкүйерлер сән салтанатпен әуежайдан күтіп алды. Сол кезде сөз алған Софья: «Қолдауларыңызды қатты сезіндім. Олимпиаданың аурасын сезініп, өз өнерімді мүлтіксіз орындағаныма қуаныштымын. Келешекте Қазақстанға алтын алып келемін деген үміттемін», – деді.
«Жібек жолы» арнасында Олимпиада ойындарына комментаторлық жасаған Шамкен Байырбек:
– Спортшыларымыздың арасынан көзім түскен бір спортшы болса, – ол Әмірғали Мұратбек (20 жаста). Ұлттық құрамадағы жас спортшы скиатлонда 50 спортшының санатында болды. Ал жастар арасында үздік 20 шаңғышының қатарынан көрінді. Ересектер арасындағы алғашқы жарыстарын өткізіп жатқан спортшы үшін бұл үлкен жетістік. Ал фристайл-акробатикадан ең жас құрам қатысқанын және олар алғаш рет Олимпиадаға бес жолдама алғанын ескеруіміз қажет. Келешекте Дінмұхамед Райымқұл, Асан Асылханнан жүлде күтеміз. Олимпиада алдындағы жаттығулары жөнді болмай қалған сияқты, болашақта қону барысындағы техникаларын жетілдіріп, үздіктер тізімінде тұрады деп сенемін, – деді.
Одан бөлек, өзінің дебюттік Олимпиадасында тұғырдан секірген 19 жастағы Илья Мизерных 8-орыннан көрінді. Алғашқы секіргенінде 140,5 метрге секіріп 137.0 ұпай алса, екінші талпынысында 138,5 метрге секіріп, жеке техникасын есепке алғандар 147,0 ұпай берді. Жалпы 281.6 ұпай алды. Бұл Қазақстан тарихындағы тұғырдан секірудегі ең үздік көрсеткіш.
Қазақстан спортшылары бұл Олимпиада ойындарында барын салды, тиісті нәтижесін алды. Еліміздің тарихында төрт жылдықтың басты додасына қатысқан ең жас құрама (орта жасы 25 жас) келесі Олимпиада ойындарында тәжірибесі толысқан спортшылар есебінде жүлдегерлер тізімінде тұрады деп сенеміз. Спорт және туризм министрі Ербол Мырзабосынов еліміздің 20 өңірінде балалардың қысқы спортпен айналысуына жағдай жасау үшін және қосымша Олимпиадаға қатысқан спортшылардың дайындығы үшін 13 миллиард теңге бөлінгенін айтты. Сөз арасында министр болашақ Олимпиада чемпиондары шығатындығына сенім білдірді. Қазақстан құрамасы қысқы Олимпиада ойындарынан 1994 жылдан бері жалпы 9 медаль алды (2 алтын, 3 күміс, 4 қола).
Серік ҚАНТАЙ
