Ақсуат ауданында дәстүрлі «Асыл бесік – Ақсуат» спорт және өнер фестивалінің алғашқы күні жоғары деңгейде өтті, – деп хабарлайды 7-su.kz ақпараттық порталы.
Биылғы дүбірлі фестивальдің шымылдығы республикалық тоғызқұмалақ турнирімен ашылып, еліміздің әр өңірінен келген үздік спортшылар ұлттық зияткерлік ойында бақ сынады. Тарихи тамыры терең ұлттық ойынды дәріптеу – өскелең ұрпақтың зияткерлік әлеуетін арттыру мен мәдени құндылықтарды сақтаудың маңызды тетігі.
Турнир қорытындысы бойынша қатысушылар жинаған ұпайларына сәйкес жүлделі орындар төмендегідей анықталды:
І орын: Елдар Дәкен (Алматы қаласы) – 6 ұпай
ІІ орын: Айдын Жакиев (Қостанай облысы) – 5,5 ұпай
ІІІ орын: Жантөре Аманқос (Қызылорда облысы) – 5,5 ұпай
IV орын: Салахаддин Агитаев (Павлодар облысы) – 4,5 ұпай
V орын: Аяна Исахан (Абай облысы) – 4,5 ұпай
VI орын: Диас Жанбау (Ақтөбе облысы) – 4 ұпай
VII орын: Ернұр Батыр (Алматы облысы) – 4 ұпай
VIII орын: Азимхан Махмұтжан (Астана қаласы) – 4 ұпай
IX орын: Айдана Молдабек (Жамбыл облысы) – 4 ұпай
Турнир барысында қатысушылар жоғары шеберлік танытып, тоғызқұмалақтың терең тактикалық мүмкіндіктерін көрсетті. Сын-сайыс ұлттық спорт түрін насихаттауға және өңірлер арасындағы достық қарым-қатынасты нығайтуға өз үлесін қосты.
Ауқымды шараға Қазақстан Республикасы Тоғызқұмалақ спорты федерациясының Қамқоршылар кеңесінің мүшесі Дулат Тастекей демеушілік білдірді. «AssylTas» қоры тек тоғызқұмалақ ойнының жүлде қоры ретінде 3 000 000 теңге бөлген. Тартысты өткен тоғызқұмалақ турнирінің 1 000 000 теңге көлеміндегі бас жүлдесін алматылық Елдар Дәкен ұтып алды.
Биылғы «Асыл бесік – Ақсуат» фестиваліне Қазақстанның түкпір-түкпірінен жүздеген спортшы мен өнерпаз жиналды. Ұйымдастырушылардың мәліметінше, фестивальдің жалпы жүлде қоры 100 миллион теңгеден асады. Ауқымды мәдени-спорттық шараның басты ұраны – «Туған жерге туыңды тік».
