Кореяның Пусан қаласында ерлер мен әйелдер арасында шинкиокушинкай каратэден сары құрылықтың 16-чемпионаты аяқталды. 8 салмақ (4 ерлер, 4 әйелдер) дәрежесінің барлығында сынға түскен Қазақстан құрама командасының спортшылары түгелдей жүлдегерлер қатарынан орын алды.
Сүйсінерлігі сол, біздің даңқты жерлесіміз Мерей Сүйінов кезекті жеңісін тойлады. Ол Азияның алпауыттарымен айқаста намысты қолдан бермей, тағы да топжарды. 85 келіге дейінгі салмақта сынға түскен талдықорғандық Мерей Сүйінов өткен жылы Ресейдің Хабаров қаласында әлем чемпионы атанса, бұл жолы Азияның таңдаулы каратэшісі екенін дәлелдеді. Мерей татамиде өткен тартысты жекпе-жектерінің бәрінде тамаша өнер көрсетіп, шыңдалған шеберлігімен көзге түсті. Сөйтіп, Мерей кезекті атағына ие болып, өңіріміздің абыройын асқақтатты. Бұл салмақта шығысқазақстандық Дмитрий Федоров қола медальді олжалады. Ал Мерейдің командалас жолдастары да тамаша табыстарға жетті. Атап айтқанда, әйелдер арасында 50 келіге дейінгі салмақта Устюгова Людмила (Алматы) чемпион атанса, оның жерлесі Дильназ Әлімова үшінші орынға ие болды. 55 кг.-ға дейінгі салмақта астаналық Валеря Иванованың шоқтығы биік болса, қарағандылық құрбысы Анастасия Мироненко қола медальді қоржынға салды. 60 кг.-ға дейінгі салмақта да астаналық Иоанна Белыхтың бағы жанды. Қарсыластарының бәрін айқын басымдықпен тізе бүктірген Иоанна алтын медальдан алқа тақты. 60 кг.-нан жоғары салмақта Гурова Екатерина (Шығыс Қазақстан) топжарды. Ал осы салмақта астаналық Азия Лесқали үшінші орынға табан тіреді.
Қазақстандық жігіттер де жарады. Мәселен, 65 келіге дейінгі салмақта облысымыздың өкілі Еркебұлан Бейсембаев чемпиондық тұғырға көтерілді. Осы салмақта алматылық Виталий Чех қола медальді қанжығалады. 75 кг.-ға дейінгі салмақ дәрежесінде алматылық Әділет Сатыбалдиевтің мысы басым болды. Оның командаласы астаналық Магарам Эюбаев үшінші жүлдегер атанды. 85-тен жоғары салмақта алматылық Илья Панкратов ақтық айқаста ғана қарсыласына жол беріп, күміс медальді қанағаттанды.
Сөйтіп, жалпыкомандалық есепте бірінші орынды айқын басымдықпен жеңіп алды. Екінші орынға татами иелері Оңтүстік Корея спортшылары ие болды. Үшінші орында Гонконг каратэшілері.
Айта кету керек, бұл жарыс келер жылы Астана қаласында өтетін әлем біріншілігіне іріктеу сыны болып табылады. Яғни, біздің жүлдегерлер осы дүбірлі додадаға жолдама алды. Яғни, келер жылы ЭКСПО көрмесі кезінде Астана төрінде өтетін әлем біріншілігіне біздің жерлесіміз Мерей Сүйінов қатысып, екінші мәрте әлем чемпионы атану үшін бағын сынайтын болады. Тағы бір ақжолтай хабарды назарларыңызға сала кетсек. 2020 жылы Токио қаласында өтетін олимпиадалық ойындардың бағдарламасына каратэ енгізілді. Сондықтан біздің жігіттер сол сында атой салып, абыройымызды асырар деген үмітіміз зор.
Бұрын олимпиадалық спорт түрі емес деп онша көп мән берілмей жүрген каратэге енді біздің өңірдің спорт саласының басшылары да оң көзімен қарап, қамқорлық танытар деген ойдамыз.
Шора БАТЫРБАЕВ.
