Аичи-Нагоя (Жапония) қалаларында 20-шы Азия ойындары 19 қыркүйек пен 4 қазанда өтеді. Қазақстан құрамасының бірінші легі дәл қазір күн шығыс елінде алғашқы жаттығуын өткізді. Еліміздің намысын қорғайтындар қатарында жетісулықтар да бар. Жалпы жетісулық спортшылар сары құрлықтағы төрт жылдықтың басты додасынан алтынсыз қайтқан емес. Биыл да спортшыларға артылар үміт зор.
Қазақстан құрамасының жалпы жүлде саны әр Азия ойындары сайын төмендеп келе жатқаны жасырын емес. Жакартада өткен (2018 жыл) Азия ойындарында Қазақстан құрамасы 7-орын (15 алтын, 17 күміс, 44 қола – жалпы 76 жүлде), 2022 жылы Ханчжоуда (Қытай) болған сайыста Бахрейн (9-орын – 12 алтын, 3 күміс, 5 қола – 20 жүлде) мен Солтүстік Кореяны (10-орын – 11 алтын, 18 күміс, 10 қола – 39 жүлде) алға оздырып 11-орын (10 алтын, 22 күміс, 48 қола – 80 жүлде) алды. Санаулы алтын алған спортшылар тізімінен жетісулықтарды да кезтіктіреміз. Мәселен, 2018 жылы самбодан 68 келіде сарыөзіктік Ділдаш Құрышбаева, 2022 жылы ескелді ауданының тумасы Егвений Федоров тасжолдағы жарыста тағы бір қазақстандық Алексей Луценкомен бір уақытта келгенімен (4:25.29) алтын медаль алған. Жапонияға баратындар тізімінде алтын бала – Федоров та бар.
Жапонияда өтетін Азия ойындарына Жетісу облысынан 8 спорт түрі бойынша 23 спортшы қатысады. Олар Сайрамкез Ақмолда (ауыр ателтика), Ильфат Абдуллин, Дәулеткелді Жаңбырбай, Александра Землянова, Медина Мұрат (бәрі садақ атудан), Евгений Федоров, Денис Сергиенко (велоспорт), Аяна Болатбекқызы (жеңіл атлетика), Аделия Өтешева (құзға өрмелеу), Ділназ Олжабаева, Ділназ Хайрушева (көгалдағы хоккей), Татьяна Никитина, Илья Таволжанский, Айбек Жақсылықов (волейбол), Екатерина Каменкова, Амина Төлегенова, Алина Әскерова, Аяулым Бақытбек, Диана Андриенко, Данил Сумский, Александр Белашов, Максим Петухов, Алексей Лукманов (регби).
Биылғы дода 43 спорт түрі бойынша 71 дисциплинада жарыс ұйымдастырылады. Бағдарламаға алғаш рет бірнеше ерекше спорт түрі енді: MMA – аралас жекпе-жек; Падел – қабырғамен қоршалған алаңдағы ракеткалық ойын; Виртуалды таеквондо – технология мен жекпе-жек тоғысқан жаңа формат; BMX-фристайл – күрделі трюктер мен секірулер; Серфинг – толқында өнер көрсету; Текбол – футбол мен үстел теннисінің үйлесімі. Сонымен қатар Азиада бағдарламасында кураш, кабадди, сепактакрау және крикет те бар. Қазақстан спортшылары аталған спорт түрлерінен де сынға түседі.
Азия ойындарына 45 ел мен аймақтан 11 мыңнан астам спортшы қатысады. Жарыстар 16 күн бойы өтеді. Қазақстан құрамасы спорттың 35 түрінен сынға түсуді жоспарлап отыр. Құраманың алдын ала тізіміне 571 спортшы енген. Бұл Ханчжоуда өткен алдыңғы Азия ойындарындағы көрсеткіштен жоғары. Ол кезде Қазақстан атынан 523 спортшы өнер көрсеткен еді. Жас спортшылар Азия ойындарына жай ғана дебют жасау үшін бармайтыны анық. Олардың кейбірі қазірдің өзінде әлемдік спорт тарихына өз есімдерін жазып үлгерген. Сондай-ақ, саңлақтарға Лос-Анджелес-2028 Олимпиадасында ел байрағын көтереді деген үміт зор.
Салтанатты ашылу кешінде Қазақстанның көк туын дзюдодан Олимпиада чемпионы Елдос Сметов пен үстел теннисінен ұлттық құрама мүшесі Сарвиноз Миркадирова ұстайды.
Қазақстан құрамасы үшін алғашқы негізгі жарыстардың бірі бокстан басталады. Бокс бәсекелері 21 қыркүйекте өтеді. Қазақстан сапында ерлер арасында Махмұд Сабырхан, Оразбек Асылқұлов, Төрехан Сабырхан, Сабыржан Аққалықов, Нұрбек Оралбай және Айбек Оралбай өнер көрсетеді. Әйелдер құрамасында Алуа Балқыбекова, Назым Қызайбай, Виктория Графеева, Аида Әбікеева және Наталья Богданова бар.
Серік ҚАНТАЙ
