Қол күресі (армрестлинг) әлемде және елімізде жылдам дамып келеді. Дәл қазіргі таңда еліміздегі барлық өңірде бұл спорт түрімен айналысатындарға арнайы үйірмелер бар.
Спорт саласындағы мамандардың айтуына қарағанда, кей спорт түрлерімен салыстырғанда қол күресі әділ өтетін жарыстар санатына жатады. Білек пен жүректің, ақыл мен айла, күш-жігер сыналған сәтте мықтының мықтысы, күштінің күштісі ғана жеңіске жетеді. Осындай білек күші шыңдалған мықты спортшылар біздің ауданда жетерлік.
Жуырда Өзбекстан мемлекетінің астанасы Ташкент қаласында қолкүрестен Азия чемпионаты өтті. Осынау бәсі жоғары байрақты бәсекеде ел намысын қорғаған сарқандық спортшылар Азия чемпионатының жүлдегері атанды. Атап айтқанда Мұхтар Исабаев I орын, Алмас Сүйімбаев II орын, Біржан Мұхамадиев IIорын, Евгений Семенов II орын иеленді.
Еділ Рысбаевтың баптауындағы спортшылар өз салмақтары бойынша қатарластарынан оза шауып, тыңғылықты дайындықтың нәтижесін көрсетті.
Жақсылық ЖОМАРТҰЛЫ
Сарқан ауданы
