Өскеменде волейболдан әйелдер командалары арасында өтіп жатқан ІІІ кіші тур ойындарының екінші күнінде былтырғы маусымның жеңімпазы «Жетісу» мен кубок иегері «Тұран» арасында Қазақстан Суперкубогы сарапқа түсті. Талдықорғандықтар ойынды үш сетте сенімді түрде аяқтап, ел Суперкубогын 5 рет жеңіп алды.
«Жетісу» волейбол клубы осыған дейін ел Суперкубогын 2015, 2018, 2019, 2024 жылдары иеленген болатын.
– Командамды және барша жанкүйерлерді шын жүректен құттықтаймын. Дәл осы ойында ойлағанымыздың көбісі жүзеге асқан жоқ. Шыны керек, бұл біздің осы маусымдағы ең сәтсіз ойындарымыздың бірі. О баста фаворит есебінде тұруымыздың өзі ойыншыларымыздың еркін ойнауына кедергі келтіргендей. Осындай тығырықтан шығып, қиыннан қиыстырған волейболшыларға алғыс айтамын. Біз Суперкубокты Жетісу жеріне қайтардық. Сол үшінде қуаныштымын және бәрі риза деп ойлаймын. Бұл Азия чемпиондар лигасына қатысуға деген бір қадам, – деді «Жетісу» волейбол клубының бас бапкері Марко Гршич.
Суперкбок үшін болған ойында «Жетісу» командасы «Тұранды» 3:0 (25:22, 25:22, 25:17) есебімен жеңді.
«Жетісу» волейбол клубының аналитигі Руслан Кенжебаев жасаған статистиканы көрсек.
«Тұранмен» болған ойынның үздігі — Мария Фролова. Ол 21 ұпай (16 шабуыл, 2 тосқауыл, 3 эйс) жинады. Одан кейін Ирина Кенжебаевамен (12 ұпай — 10 шабуыл, 1 тосқауыл, 1 эйс) Наталья Борисенко (8 ұпай — 7 шабуыл, 1 тосқауыл) орналасты.
«Жетісу» — шабуыл 42 %, тосқауыл — 7, эйс — 7.
«Тұран» — шабуыл 33 %, тосқауыл — 6, эйс — 4.
– Біз дәл осы жетістікпен тоқтап қалмайтындығымыз анық. Алдымызда маңызды ойындар күтіп тұр. Ел чемпионатындағы тартыс дәл қазір шиеленісе түсті. Чемпион болу бір еңбекті талап етсе, оны сақтап қалу мың еңбекті қажет етеді деп ойлаймын. Сондықтанда енді біз чемпионаттағы ойындарға дайындаламыз, – дейді «Жетісу» волейбол клубының ойыншысы Перизат Нұрбергенова.
«Жетісу» волейбол клубы ертең ІІІ кіші турдағы соңғы ойынын «Берел» (Шығыс Қазақстан облысы) командасымен өткізеді.
«ЖЕТІСУ-АҚПАРАТ»
