«Жетісу» волейбол клубы өз логотипін өзгертті, – деп хабарлайды 7-su.kz ақпараттық порталы. Жаңа маусымның басталар тұсында команда жаңа логотипті таныстырды. Бейсен Құранбек атындағы Журналистер үйінде болған арнайы брифингке команда жетекшілері маусымға дайындықтарын айтып, алдағы ірі жарыстар жөнінде сөз қозғап, клубтағы өзгерістерге тоқталды.
Журналистермен кездесуге арнайы келген Жетісу облысының дене шынықтыру және спорт басқармасы басшысының орынбасары Еркебұлан Дуанаев, «Жетісу» волейбол клубының директоры Нияз Жантілеуов, бапкерлер Марко Гршич пен Марат Адрышев команданың жаңа маусым алдындағы өзгерістері турасында кеңінен әңгімеледі.
Волейболдан ел чемпионаты қазанда басталады. «Жетісу» әйелдер командасы 1-2 турды 3-4 қазанда Талдықорғандағы «Жастар» спорт сарайында «Ертіс» (Павлодар) командасымен өткізеді. Ал ерлер командасы болса 17-18 қазанда (1-2 тур) «Оқжетпеспен» (Ұлытау облысы) өз алаңында жолығады. Биыл Қазақстан чемпионаты жаңа форматта өтеді. Ол үйде және түзде. Екі күн (2 ойын 2 тур) болады.
Клубтағы жаңалық – логотиптің өзгеруі. Онда Талдықорған қаласындағы стела, жеті өзен, «Ж» әрібі, жалын және клубтың құрылған жылы анық көрсетілген.
Былтыр қыздар командасы ел чемпионатын 10-шы мәрте жеңді. Ерлер құрамасы болса өз тарихында алғаш рет ішкі чемпионатта топ жарып, Қазақстан кубогымен суперкбогына ие болды. Биыл ерлер және әйелдер командасы қарашада болатын клубтар арасындағы Орталық Азия чемпионатына қатысады. Қыздар Катмандуда (Непал), ал ұлдар Нью-Делиде (Үндістан) ойнайды.
Қыздар командасы биыл арнайы шақырту алып Бразилияның Сан-Паулу қаласында желтоқсанда өтетін клубтар арасындағы Әлем чемпионатында сынға түседі. Былтыр да Азия чемпиондар лигасының жеңімпазы (2025) есебінде әр құрлықтың 8 үздік командасы қатысатын турнирде ойнады.
