Токио Олимпиадасында қолаға қол жеткізген ауыр атлеттер Зульфия Чиншанло мен Игорь Сон мінген ұшақ Алматы әуежайына келіп қонды. Чемпиондарды жанкүйерлері мен туған-туыстары құшақ-құшақ гүлмен қарсы алды. Мұндай қошеметті күтпеген Зульфия қыз көз жасына ерік берді. Бұл туралы «Жетісу» газетінің тілшісі хабарлады.
Бұдан бұрын ел қоржынына Олимпиададағы алғашқы жүлдені дзюдошы Елдос Сметов салған еді. Енді, міне, оның жолын Зульфия мен Игорь жалғастырды. Ауыр атлетикадан ең бірінші жеңіс тұғырына көтерілген 61 келі салмақта өнер көрсеткен Игорь Сон болды. Екінші күні жарысқа шыққан Зульфия да Игорьдің жетістігін қайталады. 55 келі салмақта сынға түскен Зульфия 213 келі зілтемірді көтеріп, қола медаль иеленді. Сөйтіп, жетісулық спортшылар елге чемпион болып оралды.
Зульфия әуежай алдына жиналған жанкүйерлерін көріп, өзін осыншалық сый-құрметпен қарсы алғанына қуанып, көз жасына ерік берді. Әрине, олай болатын жөні де бар. Ол араға біраз уақыт салып барып қайтадан Олимпиада жеңімпазы атанып отыр.
Ол 2007 жылдан бері Қазақстан атынан өнер көрсетіп келеді. 2008 жылы әйелдер арасындағы ауыр атлетикадан ұлттық құрамаға енді. 17 жасында әлем чемпионы атанды. Ары қарай оның жұлдызды сәттері басталды. 2012 жылы өткен Лондон Олимпаидасында алтыннан алқа тақты. Бірақ кейін допинг дауына ұшырап, спорттан шеттетілген еді. Енді, міне, ол қайтадан өзінің мықты спортшы екенін тағы да дәлелдеді. Спортшының халық алдында толқып тұрғаны да сондықтан.
— Лондон Олимпиадасынан алтын алып келгенде осындай қошеметке ие болған едім. Токиодағы жарыста қолаға ғана қол жеткізсем де ыстық ықыластарыңыз сол қалпы. Сіздерге деген алғысымыз шексіз. Мен ары қарай да ел үшін аянбай тер төгемін, – деді қуаныштан екі көзі жасқа толған Зульфия Шиншанло.
Үштөбелік Игорь Сонның да беталысы жаман емес. Ол 2019 жылы өткен әлем чемпионатында күміс медаль иеленген. Енді Токио Олимпидасының қола жүлдегері деген құрметке қол жеткізіп отыр.
— Арманым Олимпиада алтынын алу еді. Дайындығымыз да жақсы болды. Бар мүмкіндік жасалды. Бірақ, әттең, бұйырмады. Қоланы қанағат тұттық. Ендігі мақсатым Парижде өтетін Олимпиадаға тыңғылықты дайындалу. Бапкерлеріме дән ризамын. Біздің жетістігіміз сол кісілердің ерен еңбегі, – дейді Игорь Сон.
Олимпиада аяқталған жоқ. Қазақстандық спортшылар сынға түсіп жатыр. Оларға Елдос, Игорь және Зульфияның жолын берсін. Кеудесінде алтын медальдары жарқыраған чемпиондарды әуежайдан күтіп алатын күндер көп болсын деп тарастық.
Болат МӘЖИТ
Алматы
