Мемлекет және қоғам қайраткері Бекболат ТІЛЕУХАН қазақтың қазанатына қастандық жасап отыр. Танымал жылқышы Рүстем Досжанов әлеуметтік желідегі парақшасында осылай деп дабыл қағып, қазақ атбегілерінің атынан Бекболат мырзаға қарсы ашына пост жазды.
«Ассалаумағалейкүм, ағайын! Мен бүгін сіздерге арызданайын деп отырмын. Мен мұны ат менікі болғандықтан емес, қазақ атбегілерінің ой-пікірін, елдің ниетін, жеткізіп отырмын. Бекболат Тілеухан мырзаға 140 шақырымды ұтқан «Қызжирен» атты сәйгүлікке «Алтын тұғыр» беру керек деп ұсыныс беріп едік. Керек қылмады да», — деп жазады Рүстем Досжанов. Оның айтуынша, бүкіл халықтың аузында жүрген, қазақта тұңғыш рет өтіп отырған, рекорд орнатып, Гиннестер кітабына енген, бар қазақ назар аударып, жақсы көріп, ел болып қолдаған, қазақтың қазанатына бір «Алтын тұғыр» қимаған.
Мұның ұят нәрсе екенін жеткізген автор сөзін ары қарай жалғап: «Бекболат мырзаның бұл әрекетін қазақтың қазанатына қастандық жасап жатыр деп ұғам. Елбасы Кубогын ұтқан Үшқоңыр (аттың аты) мен «Алтын тұлпарды» ұтқан Қоянқасқаға «Алтын тұғыр» бергелі отырғанда, 140 шақырымды ұтқан Қызжирен «Алтын тұғырға» лайықсыз ба?! Ат үстінде 140 шақырым бойы шауып келген шабандозға үздік шабандоз атағын берсек деп ойлап едік. Елемеген қауымдастық президентінің бұл әрекеті адамгершілікке жата ма, ойланып көрейікші, ағайын! Бекболат мырзаны қазағым деп жүрегі соғатын, елдің біртуар азаматы ма деп ойлаушы едім. Ойым қате екен. Шетелден келген аттарды құрметтеп, қазақтың қазанатын құрметтемеген соң, несіне Ұлттық спортты басқарып отыр екен десеңші?!» — деп ашынады.
«ЖЕТІСУ-АҚПАРАТ»
Алматы облысы
