Есімі елге кеңінен танымал әлем чемпионы Мерей Сүйінов тәрбиелейтін каратэшілер тағы екі турнирге қатысып, қоржындарын жүлдеге толтырып қайтты. Білікті бапкердің айтуынша осы екі жарыста да біздің талдықорғандық спортшылардың мысы басым болып, қарсыластарына бет қаратпай тойтарыс беріп, жүлде тұғырына көтерілген көрінеді.
Мәселен, маусым айының басында Өскемен қаласында шинкиокушинкай каратэден Шығыс Қазақстан облысының ашық біріншілігі өткізілді. Бұл беделді турнир осы жекпе-жек өнерінің әліппесін жаңадан ашып жүрген (10-9 кю) және тәжірибелі (8 кю және одан жоғары) спортшылар арасында өрбіді. Талдықорған каратэ орталығының түлектері 9 алтын, 2 күміс, 2 қола медаль олжалады. Атап айтсақ, 5 жасар арасында Айбар Түркпенбай (20 кг.), 6-7 жастағылар арасында Бегин Михаил (20 кг.), Владлен Кузнецов ( 25 кг. дейін), Амантай Алим (30 кг.), Мадигул Бекарыс (22 кг.), Тимур Кунчаев (25 кг.), Серікхан Дінмұхамед (25 кг.), 8-9 жастағылар арасында Манас Талайбекұлы (25 кг.), Серікхан Дінмұхамед (30 келіден жоғары) алтыннан алқа тағынса, Нұрахмет Ерназар мен Турлыбек Әділет тек ақтық кездесулерінде ғана ұтылып, күміс жүлдегер атанды. Ал, 8-9 жастағылар арасында 30 кг. салмақта сынға түскен Абен Абдикерим мен Алан Талтусов 30 кг. салмақта жекпе-жекке шығып, қола медальға қол созды. Сүйсінерлігі сол, «Турнирдің ең таңдаулы спортшысы» жүлдесі де біздің жерлестерімізге бұйырды. Яғни, Серікхан Дінмұхамед бұл біріншіліктің үздік каратэшісі болып танылды. Ол арнайы жүлдемен марапатталды.
ҮШҚОҢЫР ауылында киокушинкай-кан каратэден балалар, жасөспірімдер мен қыздар арасында БАТЫР БАЛА атты АЛМАТЫ облысының біріншілігі өтті! ТАЛДЫҚОРҒАН КАРАТЭ ОРТАЛЫҒЫНЫҢ шәкірттері намысын жерге түсірмей, олжалы қайтты! Бұл бәсекеде мыналар жүлделі тұғырға көтерілді: Айбар Түркпенбай 5 жас 18 кг. дейінгі салмақта, Қадыр Еркебұлан 8-9 жас аралығында (30 кг. салмақта) 3-орынға ие болды. Давид Чен 5 жас (18 кг. жоғары), Нұрахмет Ерназар 6-7 жас (22 кг.), Болат Ернұр 6-7 жас (25 кг.), Жарылқасын Бейбарыс 8-9 жас (26 кг.) күміс жүлдегер атанды. Ал, Семен Зинченко 5 жас (18 кг. дейін), Бегин Михаил 6-7 жас (19 кг.), Амантай Әлім 6-7 жас (28 кг.) және Амира Нұрдәулетова 8-9 жас (30 кг.) жеңімпаз атанды.
Жүлдегерлердің бәрі арнайы дипломдармен, ал жеңімпаздар кубоктармен марапатталды.
Шора БАТЫРБАЕВ
