Жетісу волейболы тек елімізге ғана емес, алыс-жақын шетелге жақсы таныс. Сары ала доптағы жетістігіміз бен нәтижеміз қуантады. «Жетісу» волейбол клубының түлегі болған ойыншылар бүгінде Ұлттық құрамада өз орнын тауып, жақсы ойынымен көзге түсіп жүр. Ұжым әлі талай ойыншының биік белесті бағындыруына үлес қосары анық. Бүгінде ойын өрнегімен көзге түсіп, келешегінен мол үміт күттіретіндердің бірі – Мерей Ақжолтай.
Кейіпкеріміз волейболшыға әуелі мінездің қажет екенін айтады. Соңына дейін күрес жүргізе білетін, спортқа тән қайсарлық кез келгеннің бойынан табыла бермейді. Одан кейін төзімділік пен еңбекқорлықты да бұл тізімге жатқызуға болады. Дәл осындай ұстанымның арқасында Мерей 15 жасында Ұлттық лигада ойнады. Таңдаулы волейболшылардан жасақталған «Жетісудағы» ең жас ойыншы болды. Әрине, оңай болмағандығы белгілі, бірақ бұл үлкен жетістік еді. Зор тәжірибе. Одан кейін «Айқаракөз» (Талдықорған) командасында ойнап, үлкен сынақтардан өтті. Қиын кезеңдер де болды. Бәріне қасқайып қарсы тұрған ойыншы соның нәтижесінде төзімділікті, мықты болуды үйренді. Ал биылғы жоспары – «Айқаракөз-2» сапында жақсы ойнап, ұжым болып жеңіске жету. Бір межеге жетсең келесі шыңның менмұндалап тұратындығы бар. Мерей де бір деңгейдегі ойынымен қалып қоймай, жетістік жолында іздену мен үйренуді тоқтатпақ емес. Волейболды таңдайтындарға кейіпкерімізден кеңес: жылдамдықты талап ететін бұл керемет спорт түріне шыдамдылық керек, сол арқылы шыңдалатынды- ғына сену қажет. Бір сәттік сәтсіздікке жұтылып кетпей, еңсе тіктеп қарсы тұра білу – нағыз спортшыға тән қасиет. Әр істеген жаттығудың өз нәтижесі болады. Бір демдегі жаттығудан жетістік күту қате. Үзбей үнемі дайындалғанның бірде болмаса бірде жолы болады.
Біздің анықтама:
2005 жылдың 19 ақпанында Көксу ауданында дүниеге кел- ген. Алғашқы бапкері – Айнұр Кеңесқызы. Бүгінде Оксана Адамованы жаттықтырады. 2016 жылдан бері волейбол ойнайды. Алаңдағы алғашқы міндеті орталық тосқауыл қоюшы болса, бүгінде либеро міндетін атқарады.
Кез келген ойын сәті волейболшы үшін жауапты кезең. Қобалжу да, ойға шомып кететін сәт те жоқ емес. Мерейдің қорқынышын да, қобалжуын да әкесі мен анасының батасы сейілтіп, өзін еркін ұстауға көмектеседі. Тылсым күшке ие болады. Одан бөлек өз толқынысын Ариана Гранденің әндерімен басады. Басқа да жігерлендіретін әндер тыңдап, кездесу алдында көңіл-күйін қалыпқа түсіреді. Ал әр спортшыда бір сенімділік болады. Көп спортшыларымыз ырымды негізге алып, жарыс алдында сенімін күшейтіп жатса, біздің кейіпкеріміз мойнындағы сүйікті алқасы болса өзін жеңіл сезінетіндей. Ыңғайлы киім, ойынға деген салқынқандылық болса – спортшыға жақсы нәтиже көрсетуге көмектеседі.
Мерей 18 жасқа дейінгі Қазақстан құрамасының сапында Тайландта өткен Азия чемпионатында ойнады. Әр ойынын соңғы кездесудей өткізген волейболшының жеке жетістігі командалық нәтижеге үлкен әсер етті. Азулы Жапония, Корея, Қытай волейболшыларымен бір алаңда жолыққан волейболшыларымыз жақсы ойын өрнегін көрсетті. Көзге түскен үздіктер қатарында Мерей де бар.
«Жетісу-Ақпарат»
