Биыл өңірімізде спорттағы жетістіктер ауыз толтырып айтарлықтай. Спортшыларымыздың жеңісі де, оларға көрсетіліп жатқан қолдау да ерекше. Облыс тұрғындары үшін бұқаралық спортты дамыту мақсатында әр аудан, ауылда шағын спорт кешендері бой көтеріп, халық игілігіне берілді.
Облыс әкімі Бейбіт Исабаев журналистермен кездесуінде «Спорт саласында 18 нысан іске қосылып (3 дене шынықтыр-сауықтыру кешені, 8 спорт кешені, 2 күрес залы, 3 стадион және Үстел теннисі орталығы), 10 блокты-модульді спорт кешені орнатылғанын айтып өткен еді.
Сонымен қатар Талдықорғанда Қазақстанда баламасы жоқ «Жетісу» волейбол орталығы және инвестор есебінен спортшыларға арнап салынған төрт қабатты тұрғын үй пайдалануға берілді. Оған қоса, жақында инвестордың қаржысына Үстел теннисі орталығы ашылды. Нәтижесінде нысандардың 74,4% жаңартылып (жөндеуге жататын 39 нысан, салынған және жөндеуден өткені 29), халықты спорттық инфрақұрылыммен қамтамасыз ету 1000 адамға шаққанда 64%-ға жетті, – деді өз баяндамасында.
Еліміз үшін айтулы сын V Көшпенділер ойынына қатысқан ең жас спортшы әрі жүлдегер болған жетісулық Хамза Амангелдінің аламандағы күмісін ел әлі айтып жүр. Садақ атудан еліміздің намысын Азия чемпионатында қорғап, күміс алып Олимпиадаға қатысу мүмкіндігіне ие болған талдықорғандықтар Ильфат Абдуллин, Александр Еременко және Дәулеткелді Жаңбырбайдың да нәтижесі қуантты. Олимпиада күмісіне қол жеткізген жетісулық Демеу Жадыраевтың да жарқын жеңісі ел үшін абыройлы көрсеткіштің санатында. Командалық жарыстарда да жетісулықтардың жеңісті жолы жалғасып жатыр. Мәселен, «Жетісу» қыздар волейбол клубы Петропавлда өткен Қазақстан кубогында жеңіске жетіп (9 рет алды), Өскеменде болған Қазақстан Суперкубогына ие болып (4 мәрте алды), ел намысын Азия клубтық чемпионатында қорғайтын болды. Одан бөлек, «Жетісу» ерлер командасы да ел Кубогында қола жүлдеге ие болды. Бұл нәтижелер қысқаша қайыра жазғанымыз. Өзгерістер де жоқ емес. «Жетісу» футбол клубына бас бапкер болып ел футболының аңызы Самат Сымақов тағайындалды. Өз сөзінде аймақ басшысы Бейбіт Исабаев «Клубтың турнирлік кестеде ең соңында жүргенін қаламаймын. Жетісулықтар футболға ұялмай баратындай команданың бұрынғы атағын қайтару керек. Сол себепті оны бәсекелестік ортаға шығарамыз. Бюджеттен ақша бөлінбейді. Конкурс болады. Қатысам деген заңды тұлғаларға мүмкіндік, ал конкурста жеңгені клубпен ары қарай жұмыс істейді», – деді.
Серік ҚАНТАЙ
