Бес жылдық тарихы бар Талдықорған қаласындағы Оқушылар сарайы жас жеткіншектердің өсіп-жетілуіне мол мүмкіндік береді. Сан түрлі үйірмелер өз бағыттары бойынша қызмет атқаруда. Ән айтып, би билеп, шығармашылықпен шұғылданып жүрген бүлдіршіндер спортпен айналысуды да құп көреді.
Оқушылар сарайында спорттық бағытына «Тоғызқұмалақ», «Шахмат», «Каратэ» және «Теннис» үйірмелері тән. Аталған әр үйірме жетекшісі үшін балалардың кәсіби біліктілігі мен шығармашылық деңгейін көтеру арқылы оқу-тәрбие сапасын арттыру жолдары басты мақсат болып саналады. Бұл үйірмелерге қатысу арқылы үйірме жеткіншектері өздерінің зерттеушілікпен қатар ізденімпаздық қасиеттерін бойларына сіңіріп, салауатты өмір салтын ұстануға, ой-өрістерін дамытып, ойлау қабілеттерін шыңдай түсуге мүмкіндік алады. Сондай-ақ, заман талабына сай жаңа әдіс-тәсілдерді меңгереді. Оқушылар сарайының спорт бағытындағы бірлестік жетекшісі Жансая Қабденнің ұйымдастыруымен алдыға қойған мақсат-міндеттер сәтімен жүзеге асуда.
Бірлестік құрамындағы үйірме жетекшілері шәкірт тәрбиелеумен ғана айналыспай, оларды көпшілік іс-шараларға қатыстырып, байқаулардан жүлделі орындарды иеленіп жүр. Оқушылар сарайының демеушілігімен шығарылатын балаларға арналған шығармашылық, танымдық «Бала әлемі» журналына үйірме жеткіншектері өздерінің қызықты оқиғалары мен үйірме сабақтары, жетістіктері жайлы әсерлі сәттерімен бөлісе алады. Сарайымыздың спорттық бағыты ғана емес, жалпы барлық бірлестіктегі үйірмелер баланың жан-жақты дамуына, өсіп, жетілуіне үлкен мүмкіндік ашып бергені көпшілікке аян. Сондықтан да, өзінің жарқын болашағын ойлаған әр жеткіншек Оқушылар сарайына үлкен ынтамен асыға келеді.
Спорттық бағыт бірлестігіне тән үйірменің бірі – «Каратэ». Каратэ жапоншадан аударғанда «қарусыз қол» деген мағынаға ие. Яғни, қарусыз қорғанудың бір түрі. Қол және аяқпен қарсыласының денесінің неғұрлым осал тұсына соққы беруге негізделген. Спорттық жекпе-жектің бұл түріне 6 жастан асқан жеткіншектер қатыса алады. «Шынықсаң – шымыр боласың» деген ұстанымды ұстанатын спортшылардың таңы жаттығумен атып, күні дәл солай батады. Артынан ерген шәкірттері де салауатты өмір салтын берік ұстануды мақсат етеді. Бұл бала денсаулығының мықтылығына ғана емес, жалпы адами құндылықтарды бойына дарытып, жақсы қасиеттердің қалыптасуына үлкен ықпал етері сөзсіз.
2021-2022 оқу жылының басталуына көп уақыт өтпесе де, бірлестікке тән жеңіс аз емес. Атқарылған шаралар да жетерлік. Мәселен, қаламыздағы «Өркен» спорт комплексінде Шинкиокушинкайдан Талдықорған қаласының ашық чемпионаты өтті. Чемпионатқа «Каратэ» үйірмесінің жеткіншектері қатысып, жүлделі орындарға ие болды.
Атап айтар болсақ, 1-орын 5 жас 20 кг-ға дейін Тыныштықбай Нұрәлі, 1-орын 6 жас 20 кг-ға дейін Сабырбай Жанасыл, 2-орын 8-9 жас 35 кг-нан жоғары Ниязбек Мерей, 2-орын 10-11 жас 40 кг-ға дейін Өміржан Әлихан, 2-орын 12-13 жас 45 кг-ға дейін Серікбайқызы Мерейлім, 2-орын 16-17 жас 55 кг-ға дейін Шевченко Артем, 3-орын 5 жас 20 кг-нан жоғары Әбілсейіт Әнуар алды. Сондай-ақ, «Каратэ» үйірмесінің жеткіншектері Шинкиокушинкай каратэ бойынша Жамбыл ауданының ашық біріншілігіне қатысып, келесідей жүлделі орындарға ие болды:
20 кг дейін 6-7 жас аралығында — Сабырбай Жанасыл;
35 кг жоғары 10-11 жас аралығында — Обиченко Арсен;
30 кг дейін 8-9 жас аралығында — Махатқызы Диана;
30 кг дейін 10-11 жастағы қатысушылар арасында — Сағындық Әдиәлі;
30 кг дейін 8-9 жас аралығында Болат Әлімжан;
30 кг дейін 6-7 жас аралығында Мамытай Алдияр.
Аталмыш жарысқа Кербұлақ, Жамбыл, Қаратал ауданы, Талғар аудандарының және Талдықорған, Текелі қалаларының командалары қатысты. Жоғарыда көрсетілген үздік марапат оқушылардың ғана емес, жетекші бапкердің де төгілген тері мен үздіксіз атқарылған еңбегінің жемісті жеңісі.
Тағы бір қуанышты жаңалық, Нұр-Сұлтан қаласында өткен Тәуелсіздік күніне арналған дәстүрлі республикалық турнирге «Каратэ» үйірмесінің жеткіншектері қатысып, Сағадиева Рамина мен Ниязбек Мерей 3-орын иеленді.
Дәулет ТОРҒАЕВ,
Оқушылар сарайы «Каратэ» үйірмесінің жетекшісі
Талдықорған қаласы
Алматы облысы
