Бочча деп аталатын спорт түрі елімізде енді ғана дамып, мүгедектігі бар азаматтардың, оның ішінде балалар мен жастардың арасында қарқын алып келе жатыр. Жуырда аудан орталығы Сарқан қаласындағы Абай атындағы мектеп-гимназияда бочча спорты түрінен үйірме ашылып, шеберлік сағаты өтті.
Бүгінде ауданда ерекше күтімді қажет ететін 144 бала бар болса, үйірменің ашылу салтанатына 20 бала ата-анасымен келді. Жиынға «Жетісу облысының бочча федерациясы» қоғамдық бірлестігінің президенті, облыстық мәслихаттың төрағасы Гүлнар Тойлыбаева, аудан әкімі Ғалымжан Маманбаев, бочча спортынан жаттықтырушы Бақытгүл Имашева, бочча спортынан еліміздің чемпионы Мадияр Мұратхан және паралимпиадалық ойындардың жүлдегері Ақерке Есжанқызы қатысты.
– Облыс бойынша алғаш рет Сарқан ауданындағы жас спортшыларымыз үшін арнайы шеберлік сыныбы өткізілмек. Шараның басты мақсаты – паралимпиадалық спорт түрінің облысымызда өркендеуіне жан-жақты үлес қосу. Осы тұрғыда жастарымызды жетелеп, олардың дамуына барынша үлес қосып жүрген ата-аналарға алғыс білдіргім келеді,– деді алғашқы болып сөз алған Гүлнар Тойлыбаева. – Біздің өңірде 2022 жылдан бері ашылған бұл спорт түрі қазіргі таңда жақсы дамыған. Жетісу облысында жалпы екі мыңға жуық (1709) мүгедектігі бар жастар болса, Сарқан ауданында 144 мүмкіндігі шектеулі бала тіркелген. Оның ішінде церебралды сал ауруы 22, Даун синдромы 11, аутизмге шалдыққандар бесеу. Ерекше күтімді қажет ететін барлық балаларды дамытып, спортпен айналысуына бар күшімізді салудамыз. Бүгінгідей шеберлік сағаттарын алдағы уақытта көптеп өткізіп, облысымыздың барлық өңірлерін қамтимыз. Сарқан ауданындағы ерекше күтімді қажет ететін барша жастарымыз түрлі жарыстарда оза шауып жүрген жеңімпаздарымыздан бочча ойынының қыр-сырын үйреніп, биік белестерді бағындырады деп сенемін.
Бочча федерациясының президенті еліміздің атын әлемге танытып, Жетісу жерін адамзатқа паш ететіндей мықты спортшыларды үйірме мүшелері арасынан көргісі келетініне, ел мерейін асырып, үлкен топтан суырылып шығу үшін тер төгіп, еңбек ету керектігіне тоқталды.
Сарқан ауданының әкімі Ғалымжан Маманбаев балалардан ештеңе аямай, жағдай жасалу керектігін, әрі өңірдің ерекше балалары өздерін кем санамауы қажеттігін, сол үшін оларға арнап бочча спортынан үйірме ашылып отырғандығын, демеушілер тауып, бірыңғай киім формасымен қамтамасыз етіп, осы спортпен айналысуға барлық жағдай жасалатынын жеткізді.
Ерекше балалардың ата-аналары атынан сөз алған Меруерт Мустахибекова перзенттерін қолдап, қамқорлық жасап жүрген аудандық орталық аурухананың балалар бөлімшесіне аналық алғысын білдірді.
Одан кейін Гүлнар Тойлыбаева мен Ғалымжан Маманбаев үйірменің ашылу салтанатына орай балаларға арналған сыйлықтарды табыстап, сәттілік тіледі.
Бочча спортынан жаттықтырушы Бақытгүл Ильясқызы сайыстың шарты мен ережесін таныстырып, тәжірибелі спортшылар шеберлік сағаттарын өткізді.
Жақсылық ЖОМАРТҰЛЫ
Сарқан ауданы
