Футболдан ел чемпионатының Премьер-лига ойындары басталып та кетті. Талдықорғандық «Жетісу» командасы маусымның басын өз алаңында Қостанайдың «Тобыл» командасын қабылдап, жеңіліс тапқан болатын. Екінші турдың ойынын да өз алаңында өткізетін «Жетісу» командасы «Астана» командасын қабылдамақ. Елорданың футболшылары тегеурінді қарсылас. Өткен жылдың чемпионы бұл жолы «жетісулықтарға» қандай сый дайындап келе жатыр екен деген сауал жанкүйерлердің көкейін мазалайтыны анық. Жерлестеріміз өз жанкүйерлерін қуанта ала ма деген ой санамызды сан- саққа жүгіртеді. Бұл сауалдың жауабын кездесуден кейін анықтайтын боламыз. Осылайша кезекті ойын алдында облыс әкімінің дәстүрлі қабылдауы өтті.
«Жетісу» футбол клубын қабылдау шарасына облыстық дене шынықтыру және спорт басқармасының басшысы Тұратбек Шарапиев, спорт саласына жауапты облыс әкімінің орынбасары Жақсылық Омар және команданың бас жаттықтырушысы Дмитрий Огай мен команда мүшелері қатысты.
Кездесуді ашып, жүргізіп отырған Амандық Ғаббасұлы өткен жылғы жетістіктерге тоқталды.
– Мен ашығын айтамын, бұған дейін «Жетісу» футбол клубы қарыздан көз ашпаған еді. Футболшылар мен клуб қызметкерлеріне міндетті қаражаттары төленбей, соның салдарынан Премьер-лига сапынан да түсіп қалдық. Осы мәселе мені қатты толғандырды. Футбол ең қызықты ойынның бірі және оған қызығушылардың қатары, нақтырақ айтқанда, жанкүйерлері көп. Жанкүйер көп дегеніміз, халықтың арасында үлкен қолдауға ие деген сөз. Міне, команда жергілікті жанкүйерлерді қуанта алмай, ел чемпионатынан түсіп қалды. Үнемі халықтың арасында болған кезде жанкүйерлердің қоятын сауалы «Жетісу» командасының жай-күйі болды. Осыны қолға алуды маған үнемі айтып келді. Жанкүйерлердің көтерген мәселесі өте маңызды, олар өз қаласының патриоттары. Менің де жүрегімді ауыртатын осы мәселе. Бүгінде олқылықтардың орнын толтырып, клубтың барлық қарызын өтеп, жаңа парақ ашып отырмыз. Білікті бапкерді шақыртып, жаңа үздік ойыншыларды командаға тартуды тапсырдым. Сонымен қатар, жергілікті футболшыларды команда сапына алып, артынан із басатын жергілікті талантты аяқдоп шеберлерін де дайындауды жүктедім. Керекті қаражатын беріп, жаңа команда оқу-жаттығу жиынын кедергісіз өткізуге қолайлы жағдай жасадық. Енді осы жауапкершілікті сезініп, команда жанкүйерлердің сенімін ақтауы керек, – деді өңір басшысы.
Мұнан кейін команда бапкері Дмитрий Огай сөз алып, жаңа ойыншыларды таныстырып өтті. Команда сапы 99 пайызға өзгергенін жеткізіп, жергілікті футболшылардың да назардан тыс қалмағанын тілге тиек етті. «Әрине, бірінші ойында аз ғана ұпаймен жеңіліс таптық. Алғашқы кездесу, мұнымен ештеңе шешілмейді. Алдағы уақытта жақсы ойын көрсетеміз», – деп атап өтті ол. Мұнан кейін команда капитаны Серік Сағындықов сөз алып, Амандық Ғаббасұлына алғысын білдірді. Команданың ойын өткізуіне барлық жағдайды жасап, сенім артқанына ризашылығын білдіріп, команда мүшелерінің атынан Амандық Баталовқа есімі жазылған №7 футбол жейдесі мен доп сыйға тартты.
Жиын соңында сырттан келген ойыншылар Талдықорған қаласы жайлы өз әсерлерімен бөлісті. Литва, Грузия елінің өкілдері Талдықорған қаласы жақсы әсер қалдырғандығын айтып, өз ойларын айтты. Команда ойыншыларынан кейін Жақсылық Мұқашұлы мен Тұратбек Төлеубекұлы Жетісу командасының бапкері мен футболшыларына алдағы ойындарда жеңіске жетіп, жүлделі орындардан көрінуіне сәттілік тіледі.
Кездесудің соңында облыс әкімі Амандық Баталов командаға және команданың бас жаттықтырушысы Дмитрий Огайға нақты тапсырма жүктеп, биылғы маусымда нәтижелі орыннан көрінуді тапсырды. Мұнан кейін «Жетісу» футбол командасы өңір басшысымен естелік суретке түсті.
Ришад ТҰРҒАНБАЕВ
