Былтырғы маусымда ел чемпионы атанып, Қазақстан суперкубогын алып, Тайландта өткен Азия чемпиондар лигасында қола медальға ие болған «Жетісу» волейбол клубы жаңа маусымға арналған жаттығуға кірісті. Команда құрамында айтарлықтай өзгерістер бар. Талдықорғанда өтіп жатқан оқу-жаттығу жиынына жас ойыншылар шақырылған.
Кейінгі жылдары команданың негізгі ойыншыларына айналып, лидер болған Кристина Аниконова, Дарья Шаргородская, Валерия Якутина өз шешімдері бойынша клубтан кетті. Ал олардың орнына сербиялық байланыстырушы Мария Милевич, ресейлік Ольга Зверева, «Қуаныш» командасынан Полина Уфимцева мен Алина Алимбекова келді. Өткен маусымда ел чемпионатының «Үздік шабуылшысы» болған Мяо Ивэн командамен келісімшартты ұзартты. Оқу-жаттығу жиынына Ұлттар лигасына (VNL) Сербия құрамасының сапында қатысып жатқан Мария Милевич, әзірлікті енді бастаған Мяо Ивэн қатыспады. Олар кейін қосылады. Қытайда болатын турнирге және Жапонияда өтетін Азия ойындарына қатысатын Перизат Нұрбергенова, Татьяна Никитина, Полина Уфимцева, Мадина Бекет, Мария Сырыгина, Кристина Белова командамен жаттығудың бастапқы бөлігіне қатысып, Алматы мен Түркістандағы Ұлттық құраманың оқу-жаттығу жиынына аттанады. «Жетісу» волейбол клубының болашағына баланған, 16 жасқа дейінгі Қазақстан Ұлттық құрамасының ойыншылары Ульяна Кокина, Эвелина Черепкова, Александра Шиндова да команданың негізгі құрамымен жаттығуға кірісті.
– Жалпы чемпион болғаннан сол атақты сақтап қалған қиын. Екі есе дайындықты талап етеді. Өткен маусымда қыздарымыз да, ұлдарымыз да ел чемпионы атанып, төбемізді көкке жеткізді. Дәл осы көрсеткішпен тоқтап қалғымыз келмейді. Командаларымызға артылған сенім мол. Биыл да тұғырдың биік сатысында тұрғымыз келеді. Сол үшін қазірден бастап іске кірісіп кеттік, – дейді «Жетісу» волейбол клубының директоры Нияз Жантілеуов.
Серік Қантаев
