Талдықорған қаласында «Жетісу шұғыласы» атты республикалық тасжолдағы велошерудің соңғы кезеңі өз мәресіне жетті. Жарысқа республиканың 6 облысынан 150 спортшы қатысып, өз шеберліктерін көрсетті.
Әлемдік сипат алатын веложарысқа қатысушылардың қатары жылдан жылға артып келеді. Саламатты өмір салтын насихаттап, «Спорт – денсаулық кепілі» деген ұранмен сынға түскендер Талдықорған қаласын бірнеше күн дүбірге бөледі.
Қабанбай батыр ескерткіші алдынан бастау алған велошеру Көксу ауданы, Мұқыры ауылында түйінделді. Жарысқа қатысқандар барын салды. 17 шақырымға бақ сынағандардың арасында кәсіби спортшылармен қатар әуесқой велошабандоздар да бар. Жарыс ережесі бойынша бәсекеде 13-14 және 15-16 жасар спортшылармен қатар мемлекеттік қызметкерлер де бақ сынады.
Нәтижесінде Жетісу облысының командасы топ жарып, жанкүйерлерін қуантты. Жерлестеріміздің еншісінде 16 алтын, 6 күміс және 5 қола медаль бар.
Мұндай жарыс алда да жалғасын тауып, бұқаралық спортты дамытуға және халықты саламатты өмір салтын ұстануға шақыратыны анық.
Айгерім ШЫҢҒЫСОВА,
ЖУ білімгері
