«Жетісу» волейбол клубы 8-13 желтоқсанда Сан-Паулуда (Бразилия) өтетін клубтар арасындағы әлем чемпионатына қатысады. Төрт құрлықтан үздік екі командадан жиналып (жалпы 8 команда) өзара мықтыны анықтайды. Былтыр да Сан-Паулуда өтіп, «Жетісу» сол кезде Азия чемпиондар лигасының жеңімпазы есебінде сынға түсті.
Қазақстанның 10 дүркін жеңімпазы, Азия чемпиондар лигасының иегері (2025) «Жетісу» волейбол клубы екінші жыл қатарынан клубтар арасындағы әлем чемпионатына қатысады. «Жетісу» ұйымдастырушылардан арнайы шақырту алды. Биыл сәуірде Тайландта өткен Азия чемпиондар лигасында талдықорғанның командасы 3-орынға ие болды. Ал финалда «НЕК Ред Рокетс» (Жапония) «Накхонратчасима» (Тайланд) командасын 3:0 есебімен жеңді. Финалға шыққан екі команда тікелей клубтар арасындағы әлем чемпионатына жолдама алады. Алайда Тайландтың командасы Бразилияға барудан бас тартқаннан кейін, ұсыныс Қазақстанның клубына түсті.
Былтыр Азия чемпиондар лигасының жеңімпазы есебінде ойнап, «А» тобында сол кезде жеңімпаз болған Италияның «Савино Дель Бене Скандиччи» (0:3 – 22:25, 21:25, 20:25), Перудің «Альянц Лима» (1:3 – 26:24, 21:25, 23:25, 24:26) және сол жолы турнирде 3-орын алған алаң иелері Бразилияның «Озаску Сан-Кристован Сауде» (2:3 – 17:25, 25:23, 25:21, 18:25, 17:19) командаларымен кездесті. Бұл жолғы қарсыластар да оңай емес. Топта Еуропа чемпиондары «Вакифбанк» (Түркия), Африканың жеңімпаздары «Әл Ахли» (Египет) және Оңтүстік Америка чемпионатында топ жарған «Сеси Бауру» (Бразилия) бар.
Клубтар арасындағы Әлем чемпионатында «Жетісу» волейбол клубы «В» тобында ойнайды.
8 желтоқсан, 21:30 – «ЖЕТІСУ» (ҚАЗАҚСТАН) — «Вакифбанк» (Түркия)
10 желтоқсан, 01:00 – «SESI Volei Bauru» (Бразилия) – «ЖЕТІСУ» (ҚАЗАҚСТАН)
10 желтоқсан, 18:00 – «Al Ahly SC» (Египет) – «ЖЕТІСУ» (ҚАЗАҚСТАН)
* Қазақстан уақытымен жазылды
Қазақстан волейбол федерациясының ұсынған күнтізбесіне көз жүгіртсек, «Жетісу» клубтар арасындағы әлем чемпионатында ойнап келіп, іле-шала 20-28 желтоқсанда болатын Қазақстан кубогына қатысады. Талдықорғандықтарға желтоқсан айы оңайға түспейін деп тұр.
Ал «Жетісу» қазан айының басында ел чемпионатының жаңа маусымын бастайды. Әзірге (ресми емес) кесте бойынша ішкі біріншіліктегі алғашқы ойынын 3-4 қазанда Талдықорғанда «Ертіске» (Павлодар) қарсы өткізеді. Биыл ел чемпионаты үйде-түзде форматы бойынша алғаш рет өтпек.
Серік ҚАНТАЙ
