Шымкентте 14 жасқа дейінгі жасөспірімдер арасында теннис бойынша Қазақстан кубогы аяқталды, – деп хабарлайды 7-su.kz ақпараттық порталы Kazinform сайтына сілтеме жасап.
Еліміздің әр өңірінен келген 16 команда арасынан суырылып шыққан Жетісу өңірінің теннисшілері ел біріншілігінде топ жарды. «Beeline Arena» корттарында 24-29 тамыз аралығында өткен тартысты жарыста жас спортшылар жоғары шеберлік пен жеңіске деген мұқалмас жігер көрсетті. Сондай-ақ аталған командалық бәсекеде ұлдар арасынан Ақтөбе облысының құрамасы кубокты қанжығасына байлады.
Командалық бәсеке тартысты форматымен ерекшеленді. Бастапқы кезеңде қатысушылар төрт топқа бөлініп, үздік шыққан ұжымдар плей-офф кезеңінде жүлделі орындарды сарапқа салды. Қыздар арасындағы шешуші кездесуде Жетісу облысының құрамасы Шымкент командасымен шеберлік байқасып, 2-1 есебімен басым түсті.
Финалдық бәсекені беделді теннисші Айым Қанағатова сәтті бастап, айқын басымдықпен қарсыласын 6-0, 6-1 есебімен ойсырата жеңді. Кездесу барысында шымкенттіктер есепті теңестіргенімен, кубок тағдыры шешілетін жұптық бәсекеде Жетісудың қос саңлағы Айым Қанағатова мен Адема Альсейпулова қарсыластарына еш мүмкіндік қалдырмай, 6-0, 6-0 есебімен беделді жеңіске қол жеткізді. Осылайша өңіріміздің намысын қорғаған өрендер Жетісудың спорттық әлеуетін тағы бір мәрте дәлелдеді. Жүлделі үшінші орынды елордалық Астана-1 құрамасы еншіледі.
Ұлдар арасындағы финалдық кездесулерде Ақтөбе облысының өкілдері Шымкент құрамасын 2-1 есебімен ұтып, алтын жүлдені иеленсе, қола жүлде Алматы-1 командасының қанжығасында кетті. Жас өрендердің бұл жетістігі – еліміздегі балалар мен жасөспірімдер спортының қарқынды дамып келе жатқанының нақты көрінісі.
Жетісулық жас теннисшілердің осындай ірі доп додасында топ жаруы өңірдегі теннис мектебінің деңгейі жоғары екенін көрсетеді. Салауатты өмір салтын ұстанып, бұқаралық спортты дамыту – аймақ болашағы үшін жасалып жатқан маңызды қадам.
