Жетісу жері жасөспірімдер арасында жыл сайын велоспорттан «Жетісу шұғыласы» жарысын өткізуді дәстүрге айналдырған. Жаңа есімдердің елге танылып, талай жас спортшының ауқымды аламанға қатысуына жол ашты. Биыл бұл жарыс 9-ыншы рет өтіп отыр. Електен өткендері ел ішіндегі ірі жарыстарда сынға түседі.
Сайыс Талдықорғанның ірігесіндегі тас жолда өтіп жатыр. Биыл жарыс жолына 2010-2011, 2012-2013 жылы дүниеге келген ұл-қыздар шықты. Аталған жарысқа Шығыс Қазақстан, Маңғыстау, Жетісу облыстары мен Алматы қаласынан 90 спортшы келді. Олар жекелей, командалық, топтық және критериум бойынша сынға түседі.
Жарысты ұйымдастыру алқасының қатарында жүрген Ерлан Досаев:
– Жалпы еліміздегі жарыс күнтізбесіндегі өзгерістерге байланысты 15-16 жас аралғындағы ең мықты спортшыларымыз дәл қазір Қостанайда ел чемпионатына қатысып жатыр. Соған орай, басқада себептерге байланысты биыл өтіп жатқан «Жетісу шұғыласы» жарысына көптеген аймақтан командалар келе алмады, – дейді.
«Жетісу шұғыласы» жарысы 5-күнге созылады. Бұл сайыста көзге түскен, жақсы нәтиже көрсеткендер ұлттық құрамаға қабылданады. Одан бөлек жас велошабандоздардың спорттық разрядтарды алу үшін белгіленген нәтижені орындауға мол мүмкіндік.
Серік ҚАНТАЙ
