Қымбатшылық қысқан бүгінгі таңда мұқтаж жандарға көмек көрсетіп, қолтығынан демеу әрбір жанның азаматтық борышы. Қазақстан мұсылмандары діни басқармасының, «Зекет» және «Қайырымдылық» қорының «Жылулық сыйла» акциясы аясында Талдықорғанда 22 отбасына көмір үлестірілді.
Облыс орталығындағы мешіт имамдарының ұйытқы болуымен қолға алынған игілікті істерге мешіт жамағаттары мен басқа да азаматтар атсалысқан.
Қазақстан мұсылмандары діни басқармасының Жетісу өңірі бойынша бас имамы Керімбек Дәуітовтің айтуынша, қайырымдылық – қадірлі іс. Бұл жолы Талдықорған қаласының маңындағы саяжайларда тұрып жатқан тұрмысында қиыншылығы бар әлеуметтік жағынан аз қамтылған және көпбалалы 22 отбасына 1,5 – 2 тоннадан көмір үлестірілген.
– Жалпы сауапты істен құр қалмай қол ұшын созған әр адамға және атымтай жомарт Нұржан Рамазанұлына Алланың нұры жаусын! Осыған дейін Нұржан секілді қайырымды азаматтар мен көптің көмегінде аймақтағы кейбір мұқтаж адамдар баспаналы болып, көптеген отбасындағыларға заттай және қаржылай көмек көрсетілді. Мұндай шаралар бұдан былай да жалғасатын болады», –дейді өңір имамы.
Айдын КӘЛІМХАН
