Көктемнің кең тынысы жер-ананың тоңын жібітіп, тіршіліктің тамырына қан жүгірткен шақта ел ішінде ізгі бастамалар да бой көтерері заңдылық. Осындай тағылымды тұста Мемлекет басшысы Қасым-Жомарт Тоқаевтың: «Біздің Қазақстаннан басқа Отанымыз жоқ. Туған жерімізді ешкім сырттан келіп тазалап, көркейтіп бермейді. Отанымызды таза ұстау – әр азаматтың қастерлі парызы» деген байыпты байламы еске түсіп, көптің көкейіне ой салып, жүрегіне жауапкершілік жүгін артқаны анық. Иә, расымен, туған топырақтың тағдырына бейжай қарамау, қоршаған ортамен қатар келешекті кемелдендіретін бір асыл іс.
Жерұйықтай Жетісудың жүрегі – Талдықорған шаһарында өткен «Тазару күні» осы сөздің өміршеңдігін айғақтағандай. Қаратал өзені жағасында ұйымдастырылған «7 ozen» экологиялық игілікті шарасы – табиғатқа тағзым, елдік санаға серпін берген өнегелі іс болды. Бес жүзден астам жетісулық жұртшылық бір жағадан бас, бір жеңнен қол шығарып, өзен бойын тұрмыстық қалдықтар мен қоқыстан арылтып, айналаны ажарландыруға атсалысты. Бұл, әрине, ұлттың ұяты мен ұрпақ алдындағы аманатына деген адалдықтың көрінісі.
Шара барысында қала әкімінің орынбасары Жеңіс Андабеков бұл бастаманың маңызын айрықша атап өтті. Оның айтуынша, табиғатты аялау – бір күндік әрекетпен шектелмейтін, ұдайы жалғасатын игі дәстүрге айналуға тиіс.
– Бұл күннің маңызы зор, – деді Жеңіс Андабеков. – Экологиямызды таза ұстаудың жарқын үлгісі бүгін Қаратал жағасында көрініс тапты. Игі іс осымен тоқтап қалмайды. Алдағы екі ай көлемінде Жетісудың жеті өзенінің бойын тазарту көзделіп отыр. Сонымен қатар облыс орталығында бірқатар жергілікті сенбіліктер, жалпықалалық және экологиялық тазалық шаралары өткізілмек, – деді шаhар басшысы.
Сондай-ақ, «Lider.kz» еріктілер қозғалысының жетекшісі Матвей Шведин де бұл бастаманың қоғам үшін берері мол екенін жеткізді.
– Мұндай акциялар қоршаған ортаға нақты пайдасын тигізеді. Ең бастысы, адамдардың табиғатқа деген көзқарасын өзгертеді. Жастардың белсенді қатысуы – келешекке деген сенімнің айғағы, – деді.
Қазақ туған жерін «жер кіндікке» теңейді. Сол кіндікке кір жұқтырмау, бүгінгі буынның борышы. Табиғатты түлету тіршілікті түлетумен тең. Сондықтан әрбір азамат туған өлкесінің тазалығын өз шаңырағының шырағындай көріп, ұқыптылық пен жанашырлықты серік етуі қажет.
Тазалық – сананың да айнасы десек, ел еңсесін тіктеп, болашақтың бағдарын айқындайтын мұндай игі шаралар ұлт рухын жаңғыртып, жұртшылықтың жауапкершілік жүгін арттырары сөзсіз.
Ендеше, табиғатқа деген қамқорлық – науқандық дүниеден бұрын, ұлттың ұстынына айналуға тиіс ұлы қасиет.
Санжар СҰЛТАНҒАЗЫ
Талдықорған қаласы
