Жетісу өңірінде Жеңістің 80 жылдығы аясында денсаулық апталығы басталды. Мақсат – сұм соғыста қару алып, жауға шаппаса да, «бәрі майдан үшін, бәрі де жеңіс үшін» ұранымен елде тылда еңбек еткендерге медициналық көмек көрсету. Айтулы шара аясында 1500 тыл ардагері қамтылмақ.
Алғашқылардың бірі болып Көксу аудандық ақхалаттылар ардагерлерді тегін медициналық тексеріп, консультациялық-диагностикалық көмек көрсетті. Балпық би ауылының тұрғыны Ырысжамал Шалтанбаева биыл тоқсанның қырқасына шыққан. Әлі де тың. Дейтұрғанмен, кейде қан қысымы көтеріліп, беймаза күйге түсетіні бар. Ауа райының құбылмалылығы да денсаулыққа әсерін беретіндей. Қазіргі Алтынемел ауылында туған кейуана соғысты көрмегенмен, жеңіс туы желбіреп, бейбітшілік орнауы үшін тер төккен. Сондай қиындықты еңсерген ақжаулықты әжей балалар соғысты көрмесін, бейбітшіліктен айырмасын деген тілекте.
– Сұм соғыс басталғанда бала болдық. Бала болғанмен, балалық болмады бізде. Аналарымызбен иін тіресіп, егін жинадық, шөп шөмеледік. Ер балалар екі өгіз жегілген арбамен шөп таситын. Біз үлкендер қазған картопты жинап, таңның атысы кештің батысы қара жұмысқа жегілдік. Соның салдары болар, денсаулық соғыс аяқталған жылдарда сыр берді. Алматы қаласынан ота жасаттық. «Қырық жыл қырғын болса да ажалы келген өледі» деген. Құдайға шүкір, Қазақстанның бейбіт күндерін, бала-шағамыздың аман-есен өмір сүріп жатқанын көзбен көріп отырмын. Дәрігерлерге рахмет, жиі келіп тексеріп, кеңестерін айтып тұрады, – дейді кейуана.
Бүгінде 8 бала, 22 немере, 30-ға жуық шөбере сүйген әжейге дәрігерлер көп тынығуға, құнарлы тамақтануға, таза ауаға шығуға кеңес берді.
Денсаулық айлығы аясында көксулық Ұлбике Қонарбаеваның да шаңырағында болды. Шығыс Қазақстан облысы, Зайсан ауданы, Шілікті ауылының тумасы. Бүгінде 4 баладан 7 немере, 10 шөбере сүйген. Үлкен баласы кезінде Талдықорғанға қарай қоныс аударып, бүкіл отбасын осында алдырыпты. Өзі 40 жыл ұстаздық еткен. Ұлбике Қонарбаева соғыс басталғанда 10 жаста болған ардагер де жастайынан еңбекке жегіліпті. Айтуынша, шешесі елге ас таратады екен. Ел ашқұрсақ, алқапта қара күштің көмегімен ғана еңбектеніп жүргендерді көзбен көрген Ұлбике ана сол жылдардың ауыртпалығын көз жасынсыз елестете алмайды. Ақжаулықты ана былтыр абайсыз жамбас сүйегін сындырып, қазір төсек тартып жатыр. Қозғалысы қиын. Дәрігерлер тыл ардагерінің қан қысымын, қандағы қант құрамын тексеріп, медициналық кеңестерін берді.
Көксу ауданында 67 тыл ардагері бар. Дәрігер Мақпал Ешенова соғыстың ауыртпалығын көрген жанның барлығына дәрігерлік көмек берілетінін жеткізді. Сонымен қатар, аудан әкімдігі өкілдерінің сөзінше олардың бәріне 100 мың теңгеден аса әлеуметтік төлем беріледі екен.
Дастанбек САДЫҚ,
Көксу ауданы
