Облыс басшысы өз сөзінде Жетісу өңірінен майданға аттанған 120 мыңнан астам жауынгердің әрқайсысы Отан қорғауда қайсарлық пен батырлықтың үлгісін көрсеткенін атап өтті. Олардың қан майдандағы ерен ерлігінің арқасында 38 жауынгерге Кеңес Одағының Батыры атағы берілгенін тілге тиек етті.
– Аңызға айналған 28 панфиловшы батырлардың тең жартысы біздің облыстан болғаны – біз үшін зор мақтаныш. Бұл – Жетісу жұртының елге, жерге деген сүйіспеншілігінің, асқақ рухының айқын айғағы. Бүгінде осы мерейтойды жетісулық 2 соғыс майдангері – Ысқақ Құсайынов пен Төлеубай Шектібаевтің қарсы алып отырғаны біз үшін қуаныш. Сол сияқты сұрапыл соғыс жылдары тылда күн-түн демей еңбек етіп, майдан даласын қажеттілікпен қамтамасыз еткен біздің тыл еңбеккерлерінің Ұлы Жеңіске қосқан үлесі ұшан-теңіз. Бүгінде Қазақстан жаңа кезеңге қадам басты. «Әділетті Қазақстан» тұжырымдамасы ел ішіндегі заң мен тәртіпті нығайту, әлеуметтік әділеттілікті орнату бағытында нақты қадамдарға жол ашты. Яғни құқық қорғау органдарының қызметіне артылар жауапкершілік жүгі зор. Бүгінгі кездесуде сол жауапты міндетті ата-әкелеріміздің патриоттық дәстүріне сай абыроймен атқарып жүрген азаматтарға ризашылығымызды білдіреміз, – деді облыс әкімі Бейбіт Исабаев.
Майдангерлердің әрқайсының есімі елдің батырлық шежіресінде алтын әріппен жазылып қалатыны айқын. Осы ретте жинаға қатысушылар «Ұрпаққа ұран болған Ұлы Жеңіс» атты жаңа кітаптың тұсау кесерінің куәгері болды. Аталған туындыда соғысқа Жетісу өңірінен аттанып, ерлік көрсеткен қаһарман азаматтар жайында жазылған.
– Соғысқа қатысқан жауынгерлер біздің санамызда мәңгілік сақталады. Олар нағыз қаһармандар. Келешек ұрпақ оларға әрдайым тағзым етіп, құрметтеуі керек. Батырларымызды дәріптеп жатқан азаматтарға көптен көп алғыс айтамыз. Өздері небір қиындықты, ауыртпалықты бастарынан өткерседе тыл ардегерлері соғыстағы сарбаздарға жәрдемін тигізгені ақиқат. Олардың еңбектері еленетін күн бүгін туып отыр, – дейді тыл еңбекері Рысбек Қуатов.
Салтанатты жиында 15 тыл адагеріне Жеңістің 80 жылдық мерейтой медалі табысталды. әскери және құқық қорғау органдарының қызметкерлерінің 11-і облыс әкімінің Құрмет грамотасымен, 18-і Алғыс хатпен марапатталды.
Медет ЖҰМАБАЙ
