Қазақ халқы Ұлы Жеңіске өлшеусіз үлес қосыт. Отандастарымыз майдан даласында ерен ерлікпен шайқасып, олардың жартысынан жуығы елге қайтып оралмады. Жауынгерлеріміздің батырлығы мен қайтпас қайсарлығы – жер бетінде бейбітшілік пен тыныштықты сақтауға зор мүмкіндік берді. Аға буынның теңдессіз ерлігін құрметтеп, зұлмат соғыстың зардаптарын ешқашан ұмытпау – біздің басты борышымыз. Сол себепті де бүгінгі таңда соғыс ардагерлері үшін барынша жағдай жасалынды.
Мемлекет басшысы Қасым-Жомарт Тоқаев Қазақстан халқы Ассамблеясының ХХХІV сессиясында Ұлы Жеңіс тек тарих парағы емес бүгінгі заман үшінде үлкен сабақ екендігін айтып өткен болатын. Сондай-ақ, Жеңістің 80 жылдығына дайындық жұмыстары осыдан бір жарым жыл бұрын бастау алып, «Ұлы Жеңіс: ерлікке тағзым, ұрпаққа үлгі» атты жоспар қабылдағанында тілге тиек етті.
Жетісу жерінде де елге рух берген тарихи белестің 80 жылдығы кең көлемде аталып өтпек. Дайындық жұмыстары ақпан айынан басталып, Ұлы Отан соғысы ардагерлеріне арналған ескерткіштердің барлығына дерлік ағымдағы жөндеу жұмыстары жүргізілуде. Сонымен қатар, өлкеміздегі ұлтжанды батырлар жөнінде «Жетісулықтардың жеңіс тарихы» атты жинақ дайындалуда. Бұдан бөлек, жеңісті ұлықтаудың жарқын көрінісі ретінде мамыр айында облыс орталығы мен аудан, қалаларда түрлі мәдени-патриоттық іс-шаралар ұйымдастырылды. Атқарылып жатқан бұл жұмыстардың барлығына бөлінген қаражат облыстық мәслихат сессиясында қаралып, бекітілген болатын. Ұлы Отан соғысы ардагерлеріне жыл сайын облыстық қаражат есебінен бір жолғы әлеуметтік көмек міндетті түрде көрсетіледі. Ал биылғы жылы 80 жылдық мерейтойға орай 3 ҰОС ардагері мен мүгедектеріне және 3 215 оларға теңестірілген ардагерлерге біржолғы материалдық көмек көрсету үшін 393,8 млн теңге бөлініп, наурыз айында берілді. Әлеуметтік көмек бұнымен аяқталмақ емес. Жоғарыда аталған азаматтарға коммуналдық қызметтерге ай сайын 3 айлық есептік көрсеткіш мөлшерінде төлем жүргізілді. Сондай-ақ, Ұлы Отан соғысының мүгедектеріне және оларға теңестірілген мүгедектігі бар ардагерлерге жеке оңалту бағдарламасы негізінде, қажеттіліктеріне қарай техникалық оңалту құралдарымен бірінші кезекте қамтылып, жылына бір рет санаторлы-курорттық емдеуге тегін жолдама алады. Аталған мақсатта биылғы жылы 243 ардагерге 50 млн теңге жоспарланды. Соғыс жылдарында қайсарлық пен қаһармандықтың теңдессіз үлгісін танытқан жерлестерімізге осылайша лайықты құрмет көрсетіп, өз алғысымызды білдіріп келеміз.
Біз бүгінгі бейбіт өміріміз үшін жеңімпаз аға буынға қарыздармыз. Олардың өшпес ерлігі – кейінгі ұрпаққа үлгі-өнеге. Майдангерлерімізді жан аямай қорғаған азаттық, әділдік, теңдік құндылықтары Әділетті Қазақстан үшін де мызғымаз темірқазық болып қала береді.
Қорыта келе айтарым, Ұлы Жеңістің 80 жылдығы – бұл өткенге тағзым етіп, болашақ үшін бейбітшілікті сақтау қажеттігін түсінетін маңызды дата. Бүгінде біз ұлтымыздың қаһарман ұл-қыздарының арқасында алаңсыз еңбек етіп, ұрпақ өсіріп, жарқын болашаққа қадам басып келеміз. Ардагерлерімізге әрдайым бас иеміз! Бейбітшіліктің қадірін түсініп, оны сақтай білейік! Баршаңызға зор денсаулық, толағай табыс тілеймін!
Жеңіс күні құтты болсын!
Гүлнар ТОЙЛЫБАЕВА,
Жетісу облыстық мәслихатының төрағасы
